کەناڵێکی تەلەفزیۆنیی تورکیا بڵاوی کردەوە کە دەزگای هەواڵگریی تورکیا (میت) تۆڕێکی ١١ کەسی کە سەر بە دەزگا هەواڵگرییەکانی ئێران بوون و هاوکاریی ئەوانیان کردووە، دەستگیر کردووە.

لەمبارەوە تەلەفزیۆنی TRTی تورکی بڵاوی کردووەتەوە ئەو تۆڕە ١١ کەسییە کە لەلایەن قاچاخچییەکی مادە هۆشبەرەکانەوە سەرپەرشتی کراوە، بە نهێنی هاوکاریی دەزگا ئەمنییەکانی ئێرانی کردووە و لە کوشتن، یان ڕفاندنی چالاکوانی سیاسی و دژبەرانی ئێراندا دەستیان هەبووە.

دوێنێ ڕۆژنامەی واشنتۆن پۆست بڵاوی کردەوە کە لە ڕۆژانی ڕابردوودا حەبیب ئەسیۆد یەکێک لە سەرکردە سیاسییەکانی عەرەبی ئەهواز لە باشووری ئێران و ڕێبەری پێشووی (بزووتنەوەی ئەلنسال) لەڕێگەی ژنێکەوە کێشراوەتە تورکیا و لەوێوە ڕفێندراوە و رادەستی ئێران کراوەوتەوە.

بەپێی سەرچاوەی TRTی تورکیا ئەو تۆڕە ١١ کەسییە لە دوایین چالاکیی خۆیاندا حەبیبوڵا چەعب ناسراو بە (حەبیب ئەسیۆد)یان لە سویدەوە بە فێڵ و بەناوی بازرگانی تەختە و دار کێشاندوویەتە تورکیا و لەناو هۆتێلێک و لەلایەن خانمێک بەناوی "سابرین" دەرماخوارد کراوە و پاشان ڕادەستی ئێران کراوەتەوە.

وەزارەتی ئیتلاعاتی کۆماری ئیسلامی ئێرانیش هەواڵی دەستگیرکردنی حەبیب ئەسیۆدی پشتڕاست کردووەتەوە.

لە ماوەی دوو ساڵی ڕابردوودا چەندین ڕۆژنامەنووس، چالاکوانی سیاسی و مافی مرۆڤی ئێران لە تورکیا بە شێوەی گوماناوی کوژراون و چەند کەسی دیکەش ڕادەستی ئێران کراونەتەوە.












باسنيوز