حکومەتی تورکیا راگەیێندراوێکی نوێی لەبارەی ماوەی کارکردنی کەشتیی ئۆروچ رەیسەوە بڵاوکردەوە.

بەپێی راگەیێندراوەکە، کارەکانی لێکۆڵینەوەی کەشتییەکە لە دەریای ناوەڕاستدا بۆ 29ی تشرینی دووەمی 2020 درێژکراوەتەوە و بەدرێژایی ئەو ماوەیەش هەردوو کەشتیی ئاتامان و جەنگیزخان یاوەریی ئۆروچ رەیس دەکەن.

پێشتر وا راگەیێندرابوو کە کەشتیی ئۆروچ رەیس تا 23ـی تشرینی دووەم لە دەریای ناوەڕاستدا کار دەکات.

کەشتیی ئۆروچ رەیس یەکێکە لە کەشتییەکانی لێکۆڵینەوەی دەریایی شەپۆلزانی و تا قووڵایی هەشت هەزار مەتر توانای کردەیی سێ رەهەندی و تا قووڵایی 15 هەزار مەتر توانای کردەی دوو رەهەندیی شەپۆلزانیی هەیە.

تورکیا رۆژی دووشەممە 10ی ئابی 2020 رایگەیاند، لە چوارچێوەی هەوڵەکانی بۆ دەرهێنانی نەوت و گازی سرووشتی لە دەریای سپیی ناوەڕاست، کەشتیی "ئۆروچ رەئیس" و دوو کەشتیی دیکەی یارمەتیدەری ناردووەتە باکووری دەریای سپیی ناوەڕاست.
rudaw -