هێلاری كلینتۆن، وه‌زیری پێشووی ده‌ره‌وه‌ی ئه‌مه‌ریكا سه‌ركه‌وتنی جۆ بایدن، كاندیدی دیموكراته‌كان و كامالا هاریسی، جێگره‌كه‌ی له‌ هه‌ڵبژاردنی وڵاته‌كه‌ی به‌ "درووستكه‌ری مێژوو و لاپه‌ڕه‌یه‌كی نوێ له‌ ئه‌مه‌ریكا" وه‌سف كرد.

له‌ تویتێكدا له‌ هه‌ژماری تایبه‌تی خۆی له‌ تۆڕی تویته‌ر، كلینتۆن نووسیویه‌تی: "ده‌نگده‌ران نوێبوونه‌وه‌یان كرد.. جۆ بایدن و كامالا هاریسیان هه‌ڵبژارد، بۆ ئه‌وه‌ی ببنه‌ سه‌رۆكی وڵات و جێگره‌كه‌ی".

ئاماژه‌ی به‌وه‌شداوه‌، "ئه‌مه‌ درووستكردنی مێژووه‌.. ره‌تكردنه‌وه‌ی تره‌مپه‌.. و ده‌ستپێكی لاپه‌ڕیه‌كی نوێیه‌ بۆ ئه‌مه‌ریكا".


لای خۆشیه‌وه‌ ئه‌ندرۆ كۆمۆ، حاكمی ویلایه‌تی نیۆیۆرك داوای له‌ ئاهه‌نگگێڕان كرد، ئاگاداری رێكاره‌كانی خۆپارێزی بن له‌ په‌تای كۆرۆنا و له‌ تویته‌ر نووسیویه‌تی: "بۆ ئه‌وانه‌ی له‌ده‌ره‌وه‌ی ماڵه‌كانیان ئاهه‌نگ ده‌گێڕن، ئاگاداری سه‌لامه‌تی خۆتان بن، ئه‌وه‌تان له‌بیر بێت كه‌ "كۆڤید"ـیش له‌ده‌ره‌وه‌یه‌".


شه‌وی رابردووه‌ جۆ بایدن، كاندیدی دیموكراته‌كان سه‌ركه‌وتنی خۆی له‌ هه‌ڵبژاردنی سه‌رۆكایه‌تی ئه‌مه‌ریكا راگه‌یاند و گوتی: "من شه‌ره‌فمه‌ندم كه‌ ئه‌مه‌ریكییه‌كان منیان بۆ سه‌ركردایه‌تی وڵات هه‌ڵبژارد".

ئاماژه‌ی به‌وه‌شدا، ئه‌ركه‌ نوییه‌كه‌ی وه‌ك سه‌رۆكی وڵات "ئاسان نابێت‌"، به‌ڵێنیشیدا، كه‌ ئه‌و ده‌بێته‌ سه‌رۆكێك بۆ هه‌موو ئه‌مه‌ریكییه‌كان.
k24 -