تۆڕی میدیایی (ئەلعرەبییە) بە پشتبەستن بە ڕاگەیەندراوێکی (بزووتنەوەی عەرەبیی ئازادیخوازی ئەلئەحواز) بڵاوی کردووتەوە کە حەبیب فەرەجوڵا چەعەب ناسراو بە (حەبیبو ئەسیود) ڕێبەری پێشووی ئەو ڕێکخراوە سیاسییە لە تورکیا لەلایەن ئێرانەوە ڕفێندراوە.

بەرپرسانی (بزووتنەوەی عەرەبیی ئازادیخوازی ئەلئەحواز) ئێرانیان بەوە تۆمەتبار کردووە کە بە یارمەتیی وڵاتێکی سێیەم (حەبیب ئەسیود)ی هێناوەتە تورکیا و لەوێوە ڕفاندوویانە.

ئەلعەرەبییە لەمبارەوە بڵاوی کردووەتەوە هەندێ سەرچاوە باسیان لەوە کردووە ئەو وڵاتە کە هاوکاریی ڕادەستکردنەوەی ئەو چالاکوانە سیاسییەی کردووە، قەتەرە و چەند سەرچاوەیەکیش باسیان لەوە کردووە کە ئەنقەرە (حەبیب ئەسیود)ی لە بەرانبەر دوو ڕێبەری پەکەکە ڕادەستی تاران کردووە، بەڵام هەتا ئێستا هیچ سەرچاوەیەکی فەرمی و سەربەخۆ ئەم زانیارییانەی پشتڕاست نەکردووەتەوە.

تاکوو ئێستا وردەکاریی زیاتر لەبارەی چۆنیەتیی سەفەری ئەو چالاکوانە سیاسییەی عەرەبی ئەهواز بۆ تورکیا و چارەنووسی بڵاو نەکراوەتەوە.

تا ئێستا بەرپرسانی فەرمیی کۆماری ئیسلامیی ئێران لەبارەی ڕفاندنی حەبیب ئەسیود، هیچ کاردانەوەیەکیان نەبووە.

لە ساڵانی ڕابردوودا کۆمەلێک لە چالاکوانانی سیاسی و دژبەرانی کۆماری ئیسلامیی ئێران لە وڵاتانی دراوسێ دەستگیر کراون و ڕادەستی ئێران کراونەتەوە.

ڕۆحوڵا زەم، بەڕێوەبەری ماڵپەڕی (ئامەدنیوز) کە دانیشتووی فەڕەنسا بوو ساڵی ڕابردوو لە سەفەرێکدا بۆ بەغدا دەستگیر و ڕادەستی ئێران کرایەوە.

ساڵی ٢٠١٧ ئەحمەد نیسی ناسراو بە ئەحمەد مولی (ئەبوو ناهز) ڕێبەری پێشووی گرووپی سەربەخۆییخوازی عەرەبی ئەهواز لەبەردەم ماڵەکەی خۆی لە شاری لاهای هۆڵەندا تیرۆر کرا.







باسنيوز