سەرۆكی ئازەربایجان ئیلھام عەلییف، ئەمڕۆ دووشەممە، رایگەیاند بە بڕوای ئەو دەبێت توركیا رۆڵی خۆی بگێڕێت لە چارەسەركردنی ململانێی قەرەباخ لە ئاییندەدا.

لە دیدارێكدا لەگەڵ كەناڵی TRT Haberی توركیا عەلییف جەختیكردەوە، ئەنقەرە "ھاوكارییەكی ورەیی" پێشكەش بە وڵاتەكەی دەكات و پەیوەندییەكانی نێوان ھەردوو وڵات لە ئاستێكی بەرز دان.

سەرۆكی ئازەربایجان گوتی: "پێویستە توركیا بوونی لە كاری ئایندەیی تایبەت بە چارەسەركردنی ئاشتیانەی ململانێیەكە ھەبێت".

روونیشیكردەوە،" توركیا لایەنێكی كارای گرنگە لە ناوچەكەدا و ھاوسێی ئازەربایجان و ھاوكات ھاوسێی ئەرمینیایە، بۆیە بەڕای من رۆڵی توركیا زۆر گرنگە لە كاری ئاشتەوایی لە ئایندەدا".

عەلییف رەخنەی لە ھەڵوێستی پاریس سەبارەت بە پێشھاتەكانی قەرەباخ گرت و رایگەیاند، سەرۆكی فەرەنسا، ئیمانوێل ماكرون "بەكردەوە وڵاتەكەی خۆی دەرخستە دەرەوە" لە كۆمەڵەی مینسكی سەر بە رێكخراوی ئاسایش و ھاریكاری لە ئەوروپا"، كە پەیوەندیدارە بە چارەسەركردنی ململانێ لە قەرەباخ. فەرەنساش لەگەڵ ھەر یەك لە رووسیا و ئەمەریكا بەشدارە لە سەركردایەتییەكەیدا.

عەلییف روونیكردەوە، ئەو "لێدوانانەی ماكرون، لە لایەن ئازەربایجانەوە قبوڵكراو نییە" كاتێك گوتی: ئازەربایجان و توركیا كەسانی تیرۆریستیان ھێناوەتە ناوچەكە و باكۆ دەیەوێت دەست بەسەر قەرباخدا بگرێت.

ھەروەھا سەرۆكی ئازەربایجان لەبارەی ھەڵوێستی رووسیا لە سەر شەڕی قەرەباخ گوتی: ئاستی ھاریكاری باكۆ و مۆسكۆ بەردەوام لە ئاستێكی بەرزدا دەمێنێتەوە و پەیوەندییەكانی نێوان ھەردوو وڵات سیمای ھاوبەشی ستراتیجی ھەیە. ھەروەھا درێژەی بە قسەكانیدا و گوتی: رووسیا "دیارە دەوڵەتێكی گەورە و بەرپرسە" و لێدوانەكانی "خۆپارێزە" و "نامەی ئەرێنیمان لەو پێدەگات".

بەپێی قسەكانی سەرۆكی ئازەربایجان، ئەرمینیا ھەوڵ دەدات رووسیا بخزێنێتە لای خۆی لەو شەڕەدا و عەلییف پرسیاریكرد و گوتی: "بۆ ئەرمینیا لە ناو خاكی خۆی بۆردومانی ئازرەبایجان دەكات؟ ئەو بۆیە وادەكات بۆ ئەوەی وڵامیان بدەینەوە و خاكی ئەرمینیا بكەینە ئامانج، ئەوسا ئەرمینیا روو لە رووسیا و "رێكخراوی پەیماننامەی ئەمنی كۆمەڵەیی" بكات بۆ ھاریكاریكرن لە شەڕدا. لە ئاماژەیەكدا بۆ ئەو رێكخراوە بەرگرییە كە ھەر یەك لە رووسیا، ئەرمینیا، كازاخستان، قیرغیزستان، تاجیكستان و بیلارووس دەگرێتە خۆی.

سەرچاوە: ئینترفاكس، نوفوستی
rudaw -