لە ئیسپانیا قۆناخی کۆتایی تاقیکردنەوەی پێکوتەی دژە کۆرۆنا دەستیپێکرد، پێکوتەکە لەلایەن کۆمپانیای جێنسنی دەرمان بە هاوکاریی تیمە لێکۆڵەرەکانی هەردوو نەخۆشخانەی دولا پرێنسیسا و لاپازی ئیسپانی بەرهەمهێنراوە.

150 خۆبەخش بەسەر 10 گرووپی 15 کەسی دابەشکراون و پێکوتەکە بە سێ ئاستی جیاواز دەدرێنە خۆبەخشەکان. هیچکام لەو خۆبەخشانە تووشبووی کۆرۆنا نین، بەڵکو هەموویان ساخ و تەندروستن. لێکۆڵینەوەکان جگە لە ئیسپانیا لە هەردوو وڵاتی هۆڵەندا و ئەڵمانیاش ئەنجامدراون و 740 خۆبەخشی گرتووەتەوە.

لەنێو 75 خۆبەخشدا تەمەنی 25 کەسیان لە سەرووی 65 ساڵانە و تەمەنی 50 کەسەکەی دیکەش لەنێوان 18 تاوەکو 55 ساڵانە.

دۆلۆریس ئۆچۆوا، سەرۆکی لێکۆڵەران لە نەخۆشخانەی دولا پرێنسیسا دەڵێت "ئەمڕۆ ئەوەی کە ئەنجامیدەدەین بریتییە لە پێدانی بڕی یەکەمی ڤاکسین و هەر کە پێدانی ڤاکسینەکەمان کۆتاییهات، ئەوکات وردەکاریی پرۆسەکە باسدەکەین".

ئالبێرتۆ بۆرۆبیا، هاوئاهەنگیکاری یەکەی پێدانی ڤاکسین لە نەخۆشخانەی دولا پرێنسیسا گوتی "لیستێك بە خۆبەخشەکان دەدەن تاوەکو رۆژانە پلەی گەرمی و ئاماژەکانی دیکەی جەستەیان تۆماربکەن، لە ئازار و سووربوونی چاو و شتەکانی دیکەش".

فرانسیسکۆ ئاباد، سەرۆکی یەکەی دەرمان لە نەخۆشخانەی دولا پرێنسیسا ئاماژە بەوە دەکات "سێ ئاست لە پێدانی ڤاکسین هەن، بەشێكیان کەم، بەشێکیان مامناوەند و بەشی سێیەمیان بڕێكی زۆر لە ڤاکسینیان پێدەدرێت. چەند گرووپێک هەن، بەشێکیان لەدوای یەک مانگ لە وەرگرتنی ڤاکسینی یەکەم، بڕی دووەمی ڤاکسین وەردەگرێت، بەشێکیان دوای دوو مانگ وەریدەگرن و بەشی سێیەمیان دوای سێ مانگ. بەو جۆرە ئێمە بۆمان دەردەکەوێت کە کام لە رێگەکان سیستەمی بەرگریی مرۆڤ بەهێزتر دەکات".

به‌شی بكه‌ لە



rudaw