ئەمریکا و دوو وڵاتی عەرەبی رێگا بە باڵوێزخانەی عێراق لە وڵاتەکانیان نادەن پرسە بۆ ئەبو مەهدی موهەندیس، دابنێن.

ماڵپەڕی (سۆمەرییە نیوز) لە زاری سەرچاوەیەکی دیپلۆماسیی عێراقی بڵاوی کردووەتەوە، وەزارەتی دەرەوەی هەرسێ وڵاتی ئەمریکا، سعودیە و بەحرێن بە باڵوێزخانەکانی عێراقیا راگەیاندووە، نابێ لە وڵاتەکەیان پرسە بۆ ئەبو مەهدی موهەندیس دابنێن.

دوای کوژرانی موهەندیس، وەزارەتی دەرەوەی عێراق داوای لە باڵوێزخانە و کونسوڵخانەکانی وڵاتەکەی لە جیهان کرد، رێوڕەسمی پرسەی بۆ رێک بخەن.

جەمال جەعفەر ئال ئیبراهیمی ناسراو بە ئەبو مەهدی موهەندیس، لە ساڵی 1954 لە بەسرە لەدایک بووە. خاوەن هەدروو رەگەزنامەی عێراقی و ئێرانییە و لەگەڵ ژنێکی ئێرانیش هاوسەرگیری کردووە.

بەرەبەیانی رۆژی هەینی 3-1-2020، سوپای ئەمریکا لەڕێی فڕۆکەی بێفڕۆکەوانەوە، کاروانێکی چەکداریی حەشدی شەعبی لە فڕۆکەخانەی بەغدا بۆردومان کرد.

بەهۆی بۆردومانەکەوە، هەریەکە لە ئەبومەهدی موهەندیس، جێگری سەرۆکی دەستەی میلیشیاکانی حەشدی شەعبی و قاسم سولەیمانی، فەرماندەی سوپای قودسی سەر بە سوپای پاسدارانی ئێران و نۆ بەرپرس و چەکداری دیکەی حەشدی شەعبی، کوژران.

قاسم سولەیمانی، کە لە 11-3-1957 لە گوندی قەنات مەلەک لە شاری کرمان لە باشووری رۆژهەڵاتی ئێران لە دایک بووە، یەکێک بوو لە فەرماندە و بڕیاربەدەستە باڵاکانی ئێران.













باسنيوز