بەپێی زانیاریی میدیا فەرمییەکانی ئێران، شەوی ڕابردوو لە ڕیزی خۆپیشاندەراندا، هێزە ئەمنییەکانی ئێران بۆ چەند کاتژمیرێک باڵوێزی بەریتانیایان لە تارانیان دەستگیر کردووە و دوای چەند کاتژمێر ئازاد کراوە.

هاوکات وەزارەتی دەرەوەی بەریتانیا ئەم هەواڵەی پشتڕاست کردووەتەوە کە "ڕاب مەک‌ئەیر" بەبێ هۆ دەستگیر کراوە و پێشێلکردنی ئاشکرای یاسا و پێوەرە نێودەوڵەتی و دیپلۆماتیکەکانە.

بەپێی زانیارییەکانی ماڵپەڕی (تەسنیم) بڕیارە ئەمڕۆ یەکشەممە وەزارەتی دەرەوەی ئێران، باڵوێزی بەریتانیا بانگ بکاتە وەزارەت لە پرسی ئامادەبوونی لەناو خۆپیشاندەران و دەستگیرکرنی بکۆڵێتەوە.

ماڵپەڕی تەسنیم ئماژەی بەوەش کردووە کە "ڕاب مەک‌ئەیر" لە ڕێزی خۆپیشاندەران ئامادە بوو و دەستی کردووە بە ڕێکخستن و هەوڵی داوە خەڵک بۆ کاری تێکدەرانە هان بدات.

لە چەند ساڵی ڕابردوودا ئێران و بەریتانیا بەهۆی هێرشی خۆپیشاندەران و لایەنگرانی حکوومەتی ئێران بۆ سەر باڵوێزخانەی بەریتانیا لە تاران، ناکۆکییان هەبووە و بۆ چەند ساڵ بەریتانیا لە تاران باڵوێزی نەبوو.

بەرەبەیانی ڕۆژی چوارشەممەی هەفتەی ڕابردوو فڕۆکەیەکی نەفەرهەڵگری ئۆکرانیا کەلە فڕۆکەخانەی ئیمام خومەینی لە تاران هەستابوو، لەلایەن سیستەمی بەرگریی سوپای پاسدارانەوە خرایە خوارەوە و تێیدا نزیکەی 180 کەس کوژران کە لەناویدا هاووڵاتیانی ئێرانی، کەنەدی، ئۆکرانیا، ئەڵمانی، ئەفغانی بوون.

خستنەخوارەوەی ئەو فڕۆکە مەدەنییە کە سەرەتا بەرپرسانی ئێرانی هۆکارەکەیان بە گرفتی تەکنیکی ڕاگەیاندبوو، لە ئاستی ناوخۆی و ناوچە و جیهاندا کاردانەوەی زۆری لێ کەوتەوە و هاوکات لە ناوخۆی ئێران بووەتە قەیرانێکی دیکە بۆ ئەو وڵاتە.








باسنيوز