12 کەسی رۆژهەڵاتی کوردستان لە تێکشکانی فڕۆکەکەی تاران گیانیان لەدەستدا
ئەوانەی خەڵکی رۆژهەڵاتی کوردستانن پێنج کەسیان خەڵکی مەهابادن، دایکێکی دووگیانی کرماشانی و هەروەها بنەماڵەیەکی سێ کەسی خەڵکی سەقزن. دوو کوردی رۆژهەڵاتی کوردستانیش کە لە کەنەدا نیشتەجێبوون.
بەدەر لەو هاونیشتمانییانەی رۆژهەڵاتی کوردستان، ژمارەیەک هاووڵاتی ئەفغانستان، ئەڵمانیا، سوێد، ئۆکراینا و کەنەداش گیانیان لەدەستدا. لە تۆڕە کۆمەڵایەتییەکاندا، ڤیدیۆیەک بڵاوکراوەتەوە کە تێیدا فڕۆکەکە لە ئاسمان گڕیگرتووە و کەوتووەتە خوارەوە.
تیمەکانی فریاکەوتن سەرقاڵی کۆکردنەوەی پاشماوەی سەرنشینەکانی فڕۆکە ئۆکراینییەکە و دیاریکردنی شوناسیانن. فڕۆکەکە کە لەجۆری بیۆنگ ـە، هیچی وای لێبەجێنەماوە.
رەزا جەعفەرزادە، گوتەبێژی رێکخراوی فڕۆکەوانی ئێران دەڵێت "فڕۆکەیەکی فڕۆکەوانی ئۆکراینا، لە هێڵی تاران کیێف کاژێر 06:12 خولەک، فڕۆکەخانەی نێودەوڵەتی ئیمام خومەینی بەرەو کیێف بەجێهێشتووە، چەند خولەک دوای هەستانی لە کاژێر 06:18 خولەک کێشەی بۆ دروستدەبێت و دەکەوێتەخوارەوە".
بەرپرسان هۆکاری کەوتنەخوارەوەی فڕۆکەکەیان بۆ کێشەی تەکنیکی گەڕاندووەتەوە، بەڵام محەممەد ئیسلامی، وەزیری رێگەوبان گوتوویە دەبێ بەوردی لێکۆڵینەوە لە کەوتنە خوارەوەکە بکرێت.
بنەماڵەی رزگار رەحیمی، لێکۆڵەر و مامۆستای زانکۆ کە حەوت ساڵ لەمەوبەر بۆ وەرگرتنی بڕوانامەی دکتۆرا چوبووە کەنەدا، هەروەها دوو دکتۆری هاوژین کە یەکێکیان ناوی دکتۆر ئاروین ـە و خەڵکی سنەیە لەنێو قوربانییەکاندان.
