لە سەنعای پایتەختی یەمەن گرووپی ئەنساروڵڵای سەر بە حوسییەکان گردبوونەوەیەکی جەماوەریی دژی کوشتنی قاسم سولەیمانی، فەرماندەی قەیلقی قودسی سوپای پاسدارانی ئێران رێکخست و پاڵپشتیی خۆی بۆ تاران راگەیاند.

تاوەکو ئێستا ئەم خۆپیشاندانە کە گرووپی ئەنساروڵڵا لە سەنعا رێکیخست، یەکەم هەڵوێستی فەرمی و جەماوەرییە لەو وڵاتە. گرووپەکە کوژرانی سولەیمانیی سەرکۆنەکرد و پاڵپشتیی خۆی بۆ تاران راگەیاند کە هاوپەیمانی ستراتیجیی گرووپەکەیە.

حەموود عەباد، سەرکردەی حووسی و سەرۆکی شارەوانیی سەنعا راگەیاند، "خوێنی هەردووکیان دەبێتە سووتەمەنی و وزەی نوێ کە خۆراگریی و ورە و بەرپرسیارێتیمان پێدەبەخشێت، بۆئەوەی بە راستی و راشکاوانە رووبەڕووی ئەم بەخۆزلزانینەی ئەمریکا و زایۆنیست ببینەوە کە لەمەودوا هیچ کات ئەمریکا لە نێو ئێمە و لە ناوچەکەماندا ناحەوێتەوە."

خۆپیشاندانەکە تەنیا دەربڕی هەڵوێستی حوسییەکان نییە، چونکە پێشتر چەند سەرکردەیەکی باڵای گرووپەکە لێدوان و راگەیێندراویان بڵاوکردەوە.

عەبدولقادر سەلام، سیاسەتڤانی یەمەنی ئاماژە بەوە دەکات، "لەو باوەڕەدام کاردانەوەکان لە رووی دەنگ و راگەیاندنەوە گونجاونین لەگەڵ کاردانەوەی کارداری لەسەر زەوی. لەو باوەڕەشدا نیم ئێران، حیزبوڵڵا و ئەنساروڵڵا لە یەمەن هیچ کات وەڵامبدەنەوە، چونکە گوتەکانی ترەمپ روون و راشکاوانە بوون؛ ئەوانیش بەشێوەیەکی سەرەکی ملکەچی هەڕەشەکانی ئەمریکا دەبن و پێشبینی ناکەم کاردانەوە ببێت."

ئەم جوڵانەی حوسییەکان ئاشکرای دەکەن کە پەیوەندیی ئەوان لەگەڵ ئێران لە هەماهەنگی زیاترە و لە بەیەکبەستنەوەی چارەنووسەوە نزیکە. لەکاتێکدا شەقام لە یەمەن لە ئەنجامەکان دەترسێت کە رەنگە قەیرانەکەیان ئاڵۆزتر بکات و تەمەنی جەنگ درێژتر بکاتەوە.

بەپشتبەستن بە کاردانەوە و پێشبینییەکان و ئاماژە پێشوەختەکان، رۆژانی داهاتوو دەرئەنجامی رووداوەکان ئاشکرادەکەن. پرسیارەکەش لێرەدا ئەمەیە، ئاخۆ هێورکردنەوە لەگەڵ سعوودییە بەردەوام دەبێت یاخوود ئەم رووداوە ململانێکە بەراورد بەوەی هەبوو، گەورەتر دەکات؟