ئه‌مینداری گشتی هاوپه‌یمانی باكوری ئه‌تڵه‌سی (ناتۆ)و جه‌ستن ترۆدۆ، سه‌رۆك وه‌زیرانی كه‌نه‌دا جه‌خت ده‌كه‌نه‌وه‌، راگرتنی راهێنانه‌ سه‌ربازیه‌كانیان له‌ عێراق كاتیه‌، هاوکات داوای ئاساییكردنه‌وه‌ی گرژیی و ئاڵۆزیه‌كانی ناوچه‌كه‌ ده‌كه‌ن.

ینیس ستۆڵتنبێرگ، ئەمینداری گشتی هاوپەیمانی باكوری ئەتڵەسی (ناتۆ) جه‌ستن ترۆدۆ، سه‌رۆك وه‌زیرانی كه‌نه‌دا پەیوەندیەکی تەلەفۆنیان ئەنجامدا و باسیان له‌بارودۆخی ئێستای عێراق و خستنه‌گه‌ڕی هه‌وڵه‌كان كرد بۆ كه‌مكردنه‌وه‌ی گرژیی و ئاڵۆزیه‌كان.

به‌گوێره‌ی راگه‌یه‌ندراوه‌كه‌، ئه‌مینداری گشتی ناتۆ جه‌ختیكردوەته‌وه‌، له‌سه‌ر پاراستنی سه‌قامگیری عێراق و به‌رده‌وامبون بۆ روبه‌ڕوبونه‌وه‌ی رێکخراوی داعش.

راگرتنی كاره‌كانمان لە عێراق بۆ ماوه‌یه‌كی كاتی و به‌ئامانجی پاراستنی هێزه‌كانمانه‌


ئه‌مینداری ناتۆ ئاشكرایكردوه‌، راگرتنی كاره‌كانیان لە عێراق بۆ ماوه‌یه‌كی كاتی و به‌ئامانجی پاراستنی هێزه‌كانیانه‌ و ئاماده‌یی ته‌واویشی ده‌ربڕیوە بۆ ئه‌نجامدانه‌وه‌ی چالاكی له‌دوای ئاساییبونه‌وه‌ی دۆخی عێراق.

سه‌رۆك وه‌زیرانی كه‌نه‌دا به‌هه‌مانشێوه‌ ئاماده‌یی وڵاته‌كه‌ی بۆ هاوكاریكردن و كه‌مكردنه‌وه‌ی گرژی و ئاڵۆزیه‌كانی ناوچه‌كه‌ ده‌ربڕیوه‌


هاوكات، سه‌رۆك وه‌زیرانی كه‌نه‌دا به‌هه‌مانشێوه‌ ئاماده‌یی وڵاته‌كه‌ی بۆ هاوكاریكردن و كه‌مكردنه‌وه‌ی گرژی و ئاڵۆزیه‌كانی ناوچه‌كه‌ ده‌ربڕیوه‌ و باسی لەوەکردوە، وڵاته‌كه‌ی ئاماده‌یه‌ ده‌ست به‌ڕاهێنانه‌ سه‌ربازیه‌كان بكاته‌وه‌ له‌ دوای ئاسایبونه‌وه‌ی دۆخی ناوچه‌كه‌.

ئه‌وه‌ش له‌كاتێكدایه‌ له‌چه‌ند رۆژی رابردودا، هه‌ریه‌ك له‌هاوپه‌یمانی باكوری ئه‌تڵه‌سی (ناتۆ) و كه‌نه‌دا راگرتنی مه‌شق و راهێنانه‌ سه‌ربازیه‌كانیان به‌هۆی تێكچونی دۆخی ئه‌منی و ناسه‌قامگیریه‌وه‌ له‌ عێراق راگه‌یاند.







خەندان-