ماکورس لایتنز، باڵوێزی سویسرا لە تاران کە وەک پارێزەری بەرژەوەندییەکانی ئەمریکا لەو وڵاتە دێتە ئەژمار، لەلایەن وەزارەتی دەرەوەی ئیرانەوە بانگ کراوە و لەبارەی لێدوانە توندەکانی دۆناڵد ترەمپ هۆشدارییان داوە.

لەمبارەوە ماڵپەڕی فەرمیی وەزارەتی دەرەوەی ئێران بڵاوی کردووەتەوە، دوای کوژرانی قاسم سولەیمانی، دۆناڵد ترەمپ، سەرکۆماری ئەمریکا هەڕەشەی کردبوو کە 52 شوێن و خاڵی ئێران دەستنیشان کراون و دەکرێنە ئامانج ، لەوانە ئەو ناوەند کولتووریانەی کە بۆ ئێران گرنگییان هەیە.

بەپێی هەمان سەرچاوە عەباس عێراقچی، جێگری سیاسیی وەزیری دەرەوەی ئێران، باڵوێزی سویسرای بانگهێشت کردووە و نیگەرانیی وڵاتەکەی لە لێدوانە هەڕەشەئامێزەکانی ترەمپ دەربڕیوە و ئاشکرای کردووە ئەو گوتانە پێشێلکاریی یاسا و بنەما و پێوەرە نێودەوڵەتییەکانن.

عەباس عێراقچی ئاماژەی بەوەش کردووە: "ئەو گوتە دوژمنکارانە و نانۆرمانەی سەرکۆماری ئەمریکا، بە هیچ لەونێک قەبووڵکراو نین و لەڕاستای پێشێلکردنی یاکجارەکیی یاسا نێودەوڵەتییەکاندان"

لەبارەی ئەو گوتەیەی دۆناڵد ترەمپ کە دەڵێت هێرش دەکەینە سەر دامەزراوە کولتوورییەکان، دەڵێت: "ئەمە وەبیرهێنەرەوەی هێرشی مغۆل، یان هەوڵی گرووپە تیرۆریستییەکان کە ناوەندە کولتووری و مێژوویەکان تێک دەدەن و بەرانبەرە لەگەڵ تاوانی شەڕ."

دوێنێ باڵوێزانەی سویسرا لە تاران ئاشکرای کرد کە نامەیەکی ئەمریکایان داوەتە ئێران و هاوکات وەڵامی ئێرانیشیان بە ئەمریکا گەیاندووە.

دوای کوژرانی قاسم سلێمانی لەلایەن ئەمریکاوە بەرپرسانی باڵای سیاسی و سەربازیی هەردوولا بە شێەی توند هەڕەشەی کاردانەوەی توندی سەربازییان لە یەکتر کردووە و بەتایبەت ئێران بڕیاری داوە بە توندی تۆڵەی کوژرانی ئەو فەرماندە سەربازیەی بکاتەوە.

باڵوێزخانەی سویسرا لە تاران، لە ساڵی 1980ەوە کە پەیوەندییەکانی ئێران و ئەمریکا تێک جوون، وەک پارێزەری بەرژەوەندییەکانی ئەمریکا لە ئێران دێتە ئەژمار و کاروبارە سیاسی و دیپلۆماتیکەکانیان ڕادەپەڕێنێت.