لە ترسی دروستبوونی شەپۆلێکی دیکەی خۆپیشاندان، دەسەڵاتدارانی ئێران لە چەندین پارێزگای وڵاتەکە تۆڕی ئینتەرنێتیان داخست. کەسوکاری قوربانییانی مانگی رابردوو لە تۆڕە کۆمەڵاتییەکاندا پۆست و نامە بۆ یەکتر دەنێرن و هەڕەشەی خۆپیشاندانێکی نوێ دەکەن.

پوویا بەختیاری لە 16ی ئۆکتۆبەر لە کەرەج لەکاتی خۆپیشانداندا گوللـەیەکی هێزە ئەمنییەکان بەر سەری کەوت و گیانی لەدەستدا و بووە هێمای خۆپیشاندانەکان. دایک و باوکی بە نیازبوون لە 26ی ئەم مانگەدا خەڵک بانگهێشتبکەن و بە کۆمەڵ یادی کوڕەکەیان بکەنەوە، بەڵام هێزە ئەمنییەکانی ئێران لە ناوەڕاستی ئەم هەفتەیەدا دایک و باوکی پوویا بەختیارییان دەستگیرکرد.

دەسەڵاتدارانی ئێران ترسیان هەبوو کۆبوونەوەی خەڵک ببێتە دەستپێکی خۆپیشاندانێکی نوێ، بۆیە هێڵی ئینتەرنێتیان لە پارێزگاکانی ئەلبۆرز، کوردستان و زەنجان داخست.

مانگی رابردوو خۆپیشاندان لە ئێران لە دژی زیادبوونی نرخی سووتەمی سەریهەڵدا و حکومەت بە زەبری هێز رووبەڕووی خۆپیشاندەران بووەوە. بە گوێرەی زانیاریی ئاژانسە بەریتانییەکان، زیاتر لە هەزار و 500 کەس لەو خۆپیشاندانانەدا گیانیان لەدەستداوە.

دوای گرانکردنی نرخی بەنزین لە هەزار تمەنەوە بۆ سێ هەزار تمەن، لە 15-11-2019 شەپۆلێکی خۆپیشاندان و ناڕەزایی بەشێکی زۆری شارەکانی ئێرانی گرتەوە و رێکخراو و میدیا جیهانییەکانیش ئاماری جۆراوجۆر لەبارەی ژمارەی قوربانییان دەخەنەڕوو.