سوپای تورکیا بە بەکارهێنانی فڕۆکەی جەنگیی ئەمریکی، سیستەمی دژە مووشەکی رووسی تاقی دەکاتەوە.

بەپێی هەواڵی میدیاکانی تورکیا، تاقیکردنەوەی سیستەمی راداری دژەمووشەکی S400ـی رووسی، رۆژی 25-11-2019 لە ئاسمانی ئەنقەرەی پایتەختی تورکیا ئەنجام دراوە.

لەو تاقیکردنەوەیە، سوپای تورکیا فڕۆکەی جەنگیی F16ـی بەکارهێناوە، کە فڕۆکەیەکی جەنگیی ئەمریکییە.

پەیوەندییەکانی ئەمریکا و تورکیا بەهۆی کڕینی سیستەمی دژەمووشەکیی S400 لەلایەن ئەنقەرەوە، بە تەواوی ئاڵۆز بوون و واشنتن داوای هەڵوەشاندنەوەی گرێبەستی کڕینی ئەو سیستەمە رووسیە لە ئەنقەرە دەکات.

لە ساڵی 2017، ئەنقەرە رێککەوتنێکی لەگەڵ مۆسکۆ واژۆ کرد بۆ کڕینی سیستەمی S400، کە پێشکەوتووترین سیستەمی دژە مووشەکی و دژە فڕۆکەیە و لە رووسیا دروست دەکرێت.

ئەمریکا چەند جارێک هۆشداریی داوەتە تورکیا و رایگەیاندووە، لە ئەگەری کڕینی ئەو مووشەکە رووسییە، چەندین سزا بەسەر تورکیادا دەسەپێنێت و یەکێک لە سزاکانیش، راگرتنی گرێبەستی فرۆشتنی فڕۆکەی جەنگیی F35 بوو بەو وڵاتە.

لە رۆژی12-7-2019ـەوە، رادەستکردنی کەلوپەلەکانی سیستەمە مووشەکییەکە بە تورکیا، دەستی پێ کرد.










باسنيوز