پاش ئەوەی شەوی ڕابردوو کونسوڵخانەی ئێران لە نەجەف لەلایەن خۆپیشاندەرانەوە سووتێندرا، وەزارەتی دەرەوەی ئێران داوای کردووە حکوومەتی عێراق لە بەرانبەر هێرشبەرانەدا بەرپرسیارانە هەڵسوکەوت بکات.

لەمبارەوە عەباس مووسەوی، گوتەبێژی وەزارەتی دەرەوەی ئێران، ڕای گەیاندووە: "وێڕای ئیدانەکردنی هێرش بۆ سەر کونسوڵخانەی وڵاتەکەمان لە نەجەف، داواکارین عێراق بەرپرسیارانە و لێبڕاوانە لەگەڵ هێرشبەر و تێکدەران بجووڵێتەوە".

گوتەبێژی وەزارەتی دەرەوەی ئێران، ئاماژەی بەوەش کردووە دەبێ حکوومەتی عێراق لە پاراستنی شوێنە دیپلۆماتیکەکان ئەرکی خۆی جێبەجێ بکات و جەختی کردووەوەتە ناڕەزایی ئێران لەو بابەتە بە جیدی بە باڵیۆزی عێراق لە ئێران گەیەندراوە.

لە کاردانەوە بە سووتاندنی کونسوڵخانەی ئێران لە نەجەف، وەزارەتی دەرەوەی حکوومەتی عێراق ب بەڵاکردنەوەی بەیاننامەیەک، سووتاندنی کونسوڵخانەی ئێران لە نەجەف، ئیدانە کردووە.

لە بەیاننامەیەکدا، کە ئەمڕۆ پێنجشەممە 28-11-2019 دەری کردووە، وەزارەتی دەرەوەی عێراق پێی وایە سووتاندنی کونسوڵخانەی گشتیی ئێرن لە نەجەف هەوڵێکە بۆ تێکدانی پەیوەندییەکانی بەغدا و تاران.

وەزارەتی دەرەوەی عێراق ”بە توندترین شێوە“ سەرکۆنەی سووتاندنی کونسوڵخانەکە دەکات و رایگەیاندووە، ”کەسانی غەریب“ کونسوڵخانەکەیان سووتاندووە.

هەر لە بەیاننامەکەدا، وەزارەتی دەرەوەی عێراق ئاماژەی بە هۆشداریی پێشوەختەی حکوومەتەکەی لە تێکدانی رێڕەو و ئامانجی خۆپیشاندانەکان کردووە و رایگەیاندووە، ئەوانەی کونسوڵخانەی ئێرانیان سووتاندووە ”ئەجێندای نانیشتمانی“یان هەیە.

وەزارەتی دەرەوەی عێراق داوای لە خۆپیشاندەران کردووە ئاگادار بن و رێگا نەدەن ”کەسانی گومانلێکراو“ بچنە پاڵیان، کە ”ئامانجیان شێواندنی ناوبانگی خۆپیشاندەرانە“.





باسنيوز