سەرۆککۆماری تورکیا دەستگیرکردنی ژنێکی ئەبوبەکر بەغدادی خەلیفەی داعشی راگەیاند، ئەمەش رۆژێک دوای راگەیاندنی دەستگیرکردنی خوشکێکی بەغدادی لە ناوچەیەکی دەورووبەری حەلەب.

رەجەب تەیب ئەردۆغان ئەمڕۆ چوارشەممە لە زانکۆی ئەنقەرە گوتارێکی پێشکەشکرد و گوتی، ئەمریکا کاتێک بەغدادی دەستگیرکرد هەرایەکی گەورەی نایەوە هەموو میدیاکانی بەخۆیەوە سەرقاڵکرد.

دەڵێت ئەوا ئەوان ژن و خوشک و زاوایەکی بەغدادیان دەستگیرکردووە، ئەوەندەش وەکو ئەمریکا لەسەری نەڕۆیشتوون.

بەرپرسێکی باڵای تورکی ئەم دەستگیرکردنانەی دووپاتکردەوە، گوتی ئەوان بەدوای ئەوەن لەرێگەی ئەوانەی دەستگیریان کردوون، شوێنی داواکراوانی دیکەی داعش بدۆزنەوە.

رۆژی سێشەممە 5-11-2019 بەرپرسانی تورکیا رایانگەیاند، هێزەکانیان توانیویانە رۆژی دووشەممە 4-11-2019 لە ئۆپەراسیۆنێکدا خوشکێکی بەغدادی بەناوی رەسمیە عەواد، کە تەمەنی 65 ساڵە دەستگیربکەن.