ئەمڕۆ سێشەممە هەردوو وڵاتی توركیا و رووسیا ڕێككەوتن لەمەودوا لە مامەڵەكان و ئالوگۆڕە بازرگانییەكانیاندا بە تەواوی پشت بە لیرە و ڕۆبڵ ببەستن لە شوێنی دۆلاری ئەمریكی.

ئەنتۆن سیلیانۆڤ وەزیری دارایی رووسیا رایگەیاند ڕێككەوتنێێكی لەگەڵ توركیادا ئیمزا كردووە بۆ بەكارهێنانی دراوەكانی دوو وڵاتەكە لە بەرانبەر ئەو كەلوپەلانەی ئالوگۆڕی دەكەن.

ڕێككەوتنە نوێیەكەی ئەنكەرا و مۆسكۆ لەپێناو پێكەوە بەستنەوەی بانكەكان و كۆمپانیاكانی توركیایە بە سیستەمی سویفتی رووسی بۆ پارەدان و بەهێزكردنی ژێرخانی توركیا، بەمەش توركیا دەتوانێ كارتەكانی ئێم ئەی ئاڕی رووسی لە شوێنی كارتەكانی ماستەركارت و ڤیزاكارتی ئەمریكی بەكاربێنێت.

وەزیرە رووسیەكە ئاشكرای كردووە كە ژێرخانێكی گونجاوی دارایی بازاڕ بۆ رێككه‌وتننامه‌كه‌ پێك ده‌هێنن و ئاستی خواست له‌سه‌ر دراوه‌ نیشتمانییه‌كانی هه‌ردوو وڵات له‌لای دامه‌زراوه‌ بازرگانییه‌كان به‌رز ده‌كرێته‌وه‌.