بزووتنەوەی تاڵیبانی ئەفغانستان شاندێک دەنێرێتە کۆماری ئیسلامیی ئێران و سێ وڵاتی دیکە.

ئەمڕۆ چوارشەممە 2-10-2019، سوهەیل شاهین، گوتەبێژ بەناوی تاڵیبان لە هەژماری تایبەتیی خۆی لە تۆڕی کۆمەڵایەتیی (تویتەر)، رایگەیاندووە، مەلا عەبدولغەنی برادەر، یەکێک لە دامەزرێنەران و سەرۆکی مەکتەبی سیاسیی تاڵیبان لە قەتەر، سەرۆکایەتیی شاندەکە دەکات.

سوهەیل شاهین هەروەها رایگەیاندووە، کە شاندی بزووتنەوەکەی سەردانی هەریەکە لە وڵاتانی ئێران، پاکستان، رووسیا و چین دەکات.

ئەو سەردانەی شاندی تاڵیبان دوای راگرتنی هەموو پەیوەنییەکانی ئەمریکا و تاڵیبان دێت، کە نزیک بوون لە رێککەوتن و لە 8-9-2019 لەلایەن دۆناڵد ترەمپی سەرۆکی ئەمریکاوە راگیران.

تاڵیبان بزووتنەوەیەکی ئیسلامیی توندڕەوەی ئەفغانییە، پەیوەندییەکی بەهێزی لەگەل رێکخراوی تیرۆریستی قاعیدە هەیە و بە یەکێک لە رێکخراوە تیرۆریستییەکان دادەندرێت.

تاڵیبان لە ساڵی 1994 دروست بووە و لە ساڵی 1996 دەستی بەسەر حوکمڕانیی ئەفغانستاندا گرت و بەهۆی پاڵپشتیکردنی رێکخراوی تیرۆریستیی قاعیدە، ئەمریکا لە ساڵی 2001 حوکمڕانیی تاڵیبانی رووخاند.












باسنيوز