راوێژکاری نەمسا لە هەڵبژاردنی پەرلەمانی وڵاتەکەی، شکست بە پارتی راستڕەوی وڵاتەکەی دەهێنێت.

رۆژی یەکشەممە 29-9-2019، هەڵبژاردنی پێشوەختەی پەرلەمانی نەمسا بە بەشداریی شەش ملیۆن و 500 هەزار دەنگدەر، بەڕێوە چوو.

هەڵبژاردنەکە دوای هەڵوەشانەوەی هاوپەیمانیی فەرمانڕەوا ئەنجام درا، کە ماوەی 18 مانگ حکوومەتی نەمسای پێک هێنا بوو و بەهۆی ئاشکرابوونی ئابڕووچونی سەرکردەیەکی پارتی ئازادی (راستڕەوی توندڕەو)، لە مانگی 5ـی ئەمساڵ هەڵوەشایەوە.

بەپێی ئەنجامە نافەرمییەکان، پارتی پارێزگاران بە سەرکردایەتیی سێباستیان کورتز، راوێژکار (سەرۆک وەزیران)ی نەمسا، بە مسۆگەرکردنی %37.2ـی کورسییەکان، زۆرینەی پەرلەمانی بەدەست هێناوە.

پارتی ئازادی (راستڕەوە توندڕەوەکان) رێژەی %16ـی کورسییەکانی پەرلەمانی بە دەست هێناوە و لەچاو هەڵبژاردنی رابردوو لە ساڵی 2017، کورسییەکانیان کەمی کردووە.

سێباستیان کورتز، لە ساڵی 1986 لە دایک بووە، لە ساڵی 2005 چووەتە کۆلێژی ماف و دواتر بەر لە تەواوکردنی کۆلێژەکە، وازی لە خوێندن هێناوە.

کورتز لە ساڵی 2013 کرایە وەزیری دەرەوە و لە ساڵی 2017ش کرا راوێژکار (سەرۆک وەزیران)ی نەمسا.













باسنيوز