سەرۆک کۆماری تورکیا رایدەگەیەنێت،کە هێزەکانی وڵاتەکەی لە سنووری پارێزگای ئیدلیب لە باکووری رۆژئاوای سووریا ناکشێنەوە.

رەجەب تەییب ئەردۆغان، سەرۆک کۆماری تورکیا بە ئاژانسی (رۆیتەرز)ی راگەیاندووە، هێزەکانی تورکیا 12 خاڵی چاودێرییان لە ئیدلیب دامەزراندووە و هیچ رێککەوتنێکیشیان لەگەڵ رژێمی سووریا نییە.

رەجەب تەییب ئەردۆغان رەتی کردووەتەوە هێزەکانیان لەو خاڵە چاودێرییانە بکێشنەوە و هۆشداریی داوەتە رژێمی سووریا و رایگەیاندووە، ”دەستەوەستان ناوەستین و وەڵامی هەر هێرشێک بۆ سەر هێزەکانمان، دەدەینەوە“.

لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.

تورکیا لە سەرەتای ئەو شەڕەوە، پشتگیریی بەشێک لە ئۆپۆزیسیۆن دەکات و شاری عەفرین لە رۆژئاوای کوردستان و چەند ناوچەیەکی پارێزگای ئیدلیبیشی داگیر کردووە.

بەھۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن ھاووڵاتیی رۆژئاوای کوردستان و سووریا لە ناوخۆ ئاوارە بوون و بەشێکی زۆریشیان پەنایان بۆ هەرێمی کوردستان و وڵاتانی دەوروبەری سووریا و جیھان بردووە، جگە لە کوژرانی زیاتر لە نیو ملیۆن کەس.












باسنيوز