هاوپەیمانیی نێودەوڵەتی دەڵێت، لە کارکردن لەگەڵ هێزە هاوبەشەکانی بەردەوامدەبێت بە مەبەستی رێگەگرتن لە بەهێزبوونەوەی رێکخراوی داعش.

هاوپەیمانیی نێودەوڵەتی لە راپۆرتی مانگانەیدا دەڵێت، لەگەڵ هێزە هاوبەشەکانی کاردەکات بۆئەوەی رێگەنەدەن داعش ناوچەی لەژێر دەسەڵاتدا بێت و کەرەستەی پێویستیشی بۆ بەهێزبوونەوەی لەبەردەستدا بێت.

لە راپۆرتەکەدا هاتووە، هاوپەیمانیی نێودەوڵەتی و هێزە هاوبەشەکانی لە دەستپێکی ئۆپەراسیۆنەکانیانەوە لە ساڵی 2014، نزیکەی 110 هەزار کیلۆمەتر چوارگۆشەیان لە دەستی داعش وەرگرتوەتەوە و نزیکەی حەوت ملیۆن و 700 هەزار کەسیان لە "چەوساندنەوەی ژێر دەستی داعش" رزگارکردووە.

هاوپەیمانیی نێودەوڵەتی ئاماژەی بەوەشکردووە، ئەندامانی هاوپەیمانییەکە لەنێوان ئابی 2014 و کۆتایی تەمموزی 2019 دا 34 هەزار و 580 هێرشی ئاسمانییان ئەنجامداوە و بەلایەنی کەمەوە هەزار و 313 کەسی مەدەنی، بێمەبەست و لە ئەنجامی بۆردوومانەکانی هاوپەیمانیی نێودەوڵەتی کوژراون.

لە راپۆرتەکەدا هاتووە، هاوپەیمانیی نێودەوڵەتی پابەندە بە "یاسای پێکدادانە سەربازییەکان"، ئامانجییەتی رێگە لە هەموو جۆرە زیانێک بگرێت و پێیوایە، لەدەستدانی هەموو تاکێک رووداوێکی تراژیدییە و ئامانجیەتی کاری رژدیش بکات بۆ رێگەگرتن لەوەی ژیانی خەڵک بکەوێتە مەترسییەوە.