رۆژنامەیەکی لوبنانی ژمارەیەکی جیاواز لە رۆژان بڵاو دەکاتەوە و داوا لە خەڵکی دەکات لە خەو هەڵسن.

ئەمڕۆ پێنجشەممە 8-8-2019، رۆژنامەی (The Daily Star)ـی لوبنانی هەموو لاپەڕەکانی بە رەشی بڵاو کردەوە و لە هەر لاپەڕەیەک، بە هێڵێکی سپی پان، رستەیەکی بڵاو کردووەتەوە، کە تێیاندا بارودۆخی خراپی لوبنان روون کراوەتەوە.

رۆژنامەکە، کە بە زمانی ئینگلیزی بڵاو دەبێتەوە، لە لاپەڕەی یەکەمی خۆیدا لەسەر رووپەڕێکی رەش و بە هێڵێکی سپیی پان، نووسیویەتی ”لوبنان“.

رۆژنامەکە لە ماڵپەڕی فەرمیی خۆیدا، ئاماژەی بەوە کردووە، کە هێشتا درەنگ نییە بۆ هەڵسان لە خەو و چاکردنەوەی بارودۆخی سیاسی، ئابووری، دارایی و کۆمەڵایەتیی وڵاتەکەی.

رەستەی لاپەڕەکانی ژمارەی ئەمڕۆی رۆژنامەی (The Daily Star):

- لاپەرەی دووەم، قەیرانی حکوومی.

- لاپەرەی سێیەم، وتاری تائیفی رۆژ بە رۆژ زیاد دەبێت.

- لاپەرەی چوارەم، قەیرانی زبڵ بەردەوامە.

- لاپەرەی پێنجەم، پیسبوونی ژیگە گەیشتووەتە ئاستێکی مەترسیدار.

- لاپەرەی شەشەم، رێژەی بێکاری گەیشتووەتە %25.

- لاپەرەی حەوتەم، چەکی نایاسایی وڵاتی تەنیوە.

- لاپەرەی هەشتەم، زیاتر لە یەک ملیۆن و 500 هەزار لوبنانی لەناو وڵاتەکەیان ئاوارە بوون.

- لاپەرەی نۆیەم، قەرزی گشتیی وڵات گەیشتووەتە 100 ملیار دۆلار.

- لاپەرەی دەیەم، مایەپووچبوون هەڕەشە لە دەزگاکان دەکات.

- لاپەرەی یازدەهەم، دراوی نیشتمانی لە مەترسی دایە.

- لاپەرەی کۆتایی، لە خەو هەڵسن بەر لەوەی بارودۆخ لەدەست دەربچێت.












باسنيوز