ئەنجومەنی یەکێتیی ئەورووپا بڕیارێکی پێنج خاڵی لە دژی کۆماری تورکیا ەردەکەن.

هۆکاری بڕیارەکەی ئەنجومەنی یەکێتیی ئەورووپا، گەڕانی تورکیایە بە دوای نەوت و گازی سروشتی لە ئاوەکانی قوبرس، کە قوبرسی یۆنانی ئەو ئاوانە بە بەشێک لە خاکی خۆی دادەنێت.

بڕیارەکەی ئەنجومەنی یەکێتیی ئەورووپا ئەمڕۆ سێشەممە 16-7-2019 بڵاو کراوەتەوە و لە پێنج خاڵ پێک دێت، کە ناوەڕۆکەکەیان بریتییە لە؛

- راگرتنی جموجۆڵە ”نایاساییەکان“ی گەڕان بە دوای نەوت و گازی سروشتی لەلایەن تورکیا و گەڕانەوە بۆ گفتوگۆ.

- چارەسەرکردنی کێشەی سنووری لە دوورگەی قوبرس بەپێی یاسا نێودەوڵەتییەکان و بە گفتوگۆ.

- پێویستە بەشە تورکییەکەی قوبرس ”کەمێک بەرپرسیارێتی هەڵبگرێت“ بۆ چارەسەرکردنی کێشەی دوورگەکە بەپێی بڕیارەکانی ئەنجومەنی ئاسایشی نێودەوڵەتی و یەکێتیی ئەورووپا.

- ئەگەر تورکیا لە گەڕان بەدوای نەوت و گازی سروشتی بەردەوام بێ، ئەوا یەکێتیی ئەورووپا هەموو گفتوگۆکانی پەیوەندیدار بە گواستنەوەی ئاسمانی، لەگەڵ تورکیا رادەگرێت و هاوکارییەکانی کۆمسیۆنی یەکێتیی ئەورووپاش بۆ تورکیا بۆ ساڵی 2020، کەم دەکرێنەوە.

- یەکێتیی ئەورووپ هۆشداریی دەداتە تورکیا لە سەپاندنی سزای زیاتر بەسەر ئەو وڵاتە.

تورکیا هەوڵی دۆزینەوەی گازی سروشتی لە ئاوەکانی دەریای ناوەڕاست دەدات و قوبرسی یۆنانیش، پێی وایە تورکیا لە ئاوەکانی ئەو وڵاتە بە دوای گازدا دەگەڕێت و حکوومەتی تورکیاش رەتی دەکاتەوە و باس لەوە دەکات، کە ئەو شوێنانە دەکەونە ناو سنووری قوبرسی تورکی.









باسنیوز