ئەمڕۆ چوارشەممە وه‌زیری به‌رگریی توركیا ئاماژه‌ی بەوە دا كە ئه‌گه‌ر ئه‌مریكا فڕۆكه‌ی جه‌نگیی F35یان راده‌ست نه‌كات، وه‌كو توركیا پلانی B به‌كارده‌هێنن، به‌ڵام ئێستەش ئومێدیان نه‌بڕاوه‌ به‌وه‌ی ئه‌مریكا كارێك ناكات توركیا په‌نا بۆ ئه‌و پلانه‌ ببات.

خلوسی ئاكار له‌ناو په‌رله‌مانی توركیا كۆنگره‌یه‌كی رۆژنامه‌وانی ئه‌نجام دا و له‌ وه‌ڵامی ئه‌و پرسیاره‌ی ئه‌گه‌ر ئه‌مریكا فڕۆكه‌ی جه‌نگیی F35 راده‌ستی توركیا نه‌كات، هه‌ڵوێستی توركیا چی ده‌بێت؟ گوتی "به‌ دڵنیاییه‌وه‌ پلانی Bمان ده‌بێت، ئه‌و پلانه‌شمان له‌ ماوه‌یه‌كی زۆر نزیكدا به‌كارده‌هێنین، به‌ڵام ئێمه‌ وه‌كو توركیا هه‌موو ده‌رگاكانمان به‌رووی یه‌كتریدا له‌گه‌ڵ ئه‌مریكا دانه‌خستووه‌".

باسی له‌وه‌ش كرد ئێستە 4 فڕۆكه‌وانیان فڕۆكه‌ی F35 به‌كارده‌هێنن و كێشه‌یان نییه‌، 2 فڕۆكه‌وانی تریش راهێنان وه‌رده‌گرن و 35 بۆ 40 فڕۆكه‌وانی تریش راهێنانیان له‌سه‌ر ئه‌و فڕۆكه‌یه‌ پێده‌كرێت.










باسنيوز