بەرپرسی بەشی كاروباری مرۆیی لە ئیدارەی گەرمیان ڕای دەگەیەنێت تا ئێستا دە هەزار هاووڵاتیی ئاوارەی سنووری قەزای خورماتوو لە سنووری ئیدارەی گەرمیان دەژین و بەهۆی دڵنیانەبوونیان لە دۆخی ئەمنیی شارەكەیان، ناتوانن بگەڕێنەوە.



بێستوون ژاڵەیی، بەرپرسی بەشی كاروباری مرۆیی لە ئیدارەی گەرمیان، بە (باسنیوز)ی ڕاگەیاند: "ئێستا 10 هەزار هاووڵاتیی ئاوارەی سنووری قەزای خورماتوو، لە سنووری ئیدارەی گەرمیان دەژین كە 60 خێزانیان لەنێو كەمپی ئاوارەكانی تازەدێ نیشتەجێبوون و ئەوانی دیكەشیان لە شوێنی نیشتەجێبوونی‌تر لە شارەكانی كەلار و كفری و شارەدێكانیاندا دەژین".



گوتیشی "بەشێك لەو خێزانانە لە پێش ڕووداوەكانی 16 ی ئۆكتۆبەری ساڵی ڕابردوو بەهۆی تەندوتیژی و نائارامییەكانی قەزای خورماتوو هاتوونەتە سنوورەكە و بەشێكیشیان پاش 16 ئۆكتۆبەر هاتوون و كوڕ و منداڵیان لەگەڵ لایەنە كوردییەكان بوون و پێشمەرگە و پۆلیس بوون و هێشتا دڵنیا نین لە دۆخی ئەمنیی شارەكەیان، بۆیە ناگەڕێنەوە".



ڕوونیشی كردەوە: "بەشێكی‌تر لەو خێزانانە لەو كەسانەن كە ماڵ و حاڵیان سووتێنراوە و بەرژەوەندیی بازرگانییان لەو شارەدا نەماوە و بەشێكیشیان كارگە و كارخانەكانیان سووتێنراوە و تاڵان كراوە و بەشێكیشیان ئەو دەوڵەمەندانەن كە هێشتا دڵنیا نین لە ماڵ و حاڵی خۆیان و لێرە سەرقاڵی كاركردنن".



16 ی ئۆكتۆبەری ساڵی ڕابردوو، هێزەكانی سوپای عێراق و حەشدی شەعبی بە هاوكاریی گرووپێكی ناو یەكێتیی نیشتمانیی كوردستان، هێرشیان كردە سەر ناوچە كوردستانییەكانی دەرەوەی ئیدارەی هەرێمی كوردستان و بەو هۆیەوە ژمارەیەكی زۆر هاووڵاتیی كورد شەهید و بریندار بوون و هەزاران خێزانیش ئاوارەی شارەكانی هەرێمی كوردستان بوون.




باسنیوز