جێگری وەزیری دەرەوەی رووسیا، میخائیل بوگدانۆف، رۆژی چوارشەممە رایگەیاند: بەرپرسانی وڵاتەکەی هیوادارن ئەم بارودۆخە قەیراناویەیی سووریا تا کۆتایی ئەمساڵ واتە مانگێکی دیکە کۆتایی پێبێت.



بۆگدانۆف، گوتی: چۆن گروپی دەوڵەتی ئیسلامی(داعش) دەبێ لە رەققە و مووسڵ دەربکرێت، دەبێ تیرۆریستانیش لەحەلەب دەر بکرێن. مەبەستی ئەم بەرپرسەی رووسیا هێزە چەکدارەکانی دژبەری بەشار ئەسەدە.

لە لایەکی دیکەوە، ئاژانسی هەواڵی ئیتارتاس رایگەیاند: رووسیا لەبارەی سووریاوە دەگەڵ تیمی دۆناڵد ترامپی سەرۆکی هەڵبژێردراوی ئەمریکا لە پێوەندی دایە.

لەهەمان کاتدا رێکخراوی چاودێری مافی مرۆڤی سووریاش کە بنکەکەی لە بەریتانیایە، راگەیاند:هێرشی سەربازانی سووریا لە رۆژهەڵاتی حەلەب ٢١ کوژراوی سڤیلی لێکەوتووەتەوە.
PAYAMNER-