وەزیری دەرەوەی تورکیا بە سەردانێکی چاوەڕواننەکراو گەیشتە یۆنان و لەگەڵ هاوتا یۆنانییەکەیدا کۆبووەوە. گوماندەکرێت لەو سەردانەدا وەزیری دەرەوەی تورکیا داوای گەڕاندنەوەی ئەو هەشت سەربازە بكات، کە لەدوای هەوڵی کودەتاکەی 15ی تەممووز داوای مافی پەنابەریان لەو وڵاتە کردووە.

هاوشێوەی سەردانەکەی بۆ ئێران کە بە نهێنی ئەنجامیدا، مەولود چاوشئۆغڵو، وەزیری دەرەوەی تورکیا بەبێ ئەوەی پێشوەختە هیچ زانیارییەک رابگەیێنێت، گەیشتە یۆنان.

میدیاکانی تورکیا بە پشتبەستن بە سەرچاوەیەکی وەزارەتی دەرەوە رایانگەیاندووە، چاوشئۆغڵو لەلایەن نیکۆس کۆسیاس، وەزیری دەرەوەی یۆنان بانگهێشتکراوە.

دوای گەیشتنی بە دورگەی گیریتی یۆنان، لە رێستۆرانتی یەکێک لە هۆتێلەکانی دورگەکە وەزیری دەرەوەی یۆنان و تورکیا کۆبوونەوەیەکیان ئەنجامدا.

مەولود چاوشئۆغڵو، وەزیری دەرەوەی تورکیا دوای بەڕێکەوتنی بەرەو هیندستان، ئاشکرابوو کە ئاراستەی سەردانەکەی گۆڕیوە و لە تارانی پایتەختی ئێران نیشتووەتەوە و دوای کۆبوونەوەیەکی پێنج کاژێری لەگەڵ کاربەدەستانی ئەو وڵاتە، بەرەو هیندستان بەڕێکەوتبوو.
RUDAW -