رێکخراوی چاودێری مافەکانی مرۆڤ، بە ھیومان رایتس وۆچ، داوای لە حکومەت و بەرپرسانی عێراق کرد، رێگە نەدەن میلیشیا شیعەکانی حەشدی شەعبی بەشداری ئۆپەراسیۆنی کۆنتڕۆڵکردنەوەی مووسڵ بکەن.

ھیومان رایتس وۆچ، لە راپۆرتێکدا، پێشێلکارییەکانی حەشدی شەعبی لە ناوچە تازە ئازادکراوەکانی بڵاوکردەوە و رایگەیاند: حکوومەتی عێراق بۆ پاراستنی گیانی ھاوڵاتییانی سڤیل هەوڵ بدات و ئەگەر حەشدی شەعبی لە شەڕی مووسڵدا بەشداربێت، ھاوڵاتییانی مووسڵیش رووبەڕووی پێشێلکارییەکانی حەشدی شەعبی دەبنەوە.

هیومان رایتس وۆچ لە درێژەی راپۆرتەکەیدا رایگەیاندووە: حەشدی شەحبی لە دەرەوەی یاسا ھەڵسوکەوت دەکەن و سەرجەم ئەو پێشێلکارییە دژە مرۆییانەی ئەو گرووپە چەکدارییە ئەنجامیانداوە، ھیچ لێپێچینەوەیان لەگەڵدا نەکراوە.