وەزیری کاروباری دەرەوەی وڵاتی سعوودیا ڕایگەیاندووە، لر بەرانبەر دەستێوەردانەکانی ئێران لە کاروباری وڵاتانی ناوچە، هەروەها پشتیوانی کردنی ئەو حکوومەتە لە گرووپە تیرۆریستییەکان جێگای قبووڵ نییە و بێ وڵام نامێنێتەوە.

“عادڵ جبیر” وەزیری دەرەوەی سعوودییە بە ڕۆژنامەی “جروزالم‌پست “ی گوتووە کردەوەکانی حکوومەتی ئێران و بەتایبەت سوپای پاسداران لە ناوچەی رۆژهەڵاتی ناویندا هیچ باش نییە و خەڵک لێی زەرەرمەند بوون.

ئەو لێپرسراوە ئەوەشی خستووەتەڕوو، ئێران تەنیا وڵاتێکە کە دەستێوەردانی کاروباری ناوچەی ڕۆژهەڵاتی ناوین دەکات و پێویستە لەلایەن وڵاتانی عەرەبییەوە پێشی پێ بگیردرێت.

عادڵ جبیر ئەوەشی خستووەتەڕوو، سعوودیا زۆر هەوڵی دا کە پەیوەندییەکی باش و تەندروست لەگەڵ ئێران ساز بکات، بەلام پشتیوانییەکانی ئەو دەوڵەتە لە تیرۆر ئەو پەیوەندییانەی تێکدا.

لەلایەکی دیکەوە “”عەلی شەمخانی” سەرپەرشتی باڵای ئەنجومەنی ئاسایشی نەتەوەیی ئێران گوتوویەتی: دەزگا ئەمنی و هەواڵگرییەکانی سعوودیا بەرپرسیاری سەرەکین لە هەمبەر دروست کردنی گرووپە جیهادی و تەکفیرییەکاندا.

پێشتریش عەلی خامنەیی رێبەری کۆماری ئیسلامی ئێران رەخنەی زۆر توندی لە ئۆپەراسیۆنی هاوبەشی وڵاتانی عەرەبی بە سەرۆکایەتیی سعوودیا گرتبوو و هەڕەشەشی لەو هاوپەیمانیەتیە کردبوو.

بە گوتەی کارناسانی پرسە سیاسییەکانی ناوچەی رۆژهەڵاتی ناڤین. ئێران بە هەموو توانایەوە پشتیوانی لە حوسییەکانی یەمەن دەکات و ئەمەش لە حاڵێک دایە کە سعوودیاش خوازیاری ئەوەیە کە دەوڵەتی یاسایی “مەنسوور هادی” لە یەمەن بگەڕیتەوە سەر دەسەڵات.











باسنيوز