وه‌زیری ده‌ره‌وه‌ی ئه‌مریكا جۆن كیری، كۆریای باكووری به‌ پێشێل كردن و پشتگوێ خستنی پابه‌ندبوونه‌كانی نێوده‌وڵه‌تی تۆمه‌تبار كرد. له‌ میانی سه‌ردانه‌كه‌ی بۆ سیئۆلی پایته‌ختی كۆریای باشوور، كیری دوای كۆبوونه‌وه‌ی له‌گه‌ڵ هاوتا كۆریه‌كه‌ی یون بیونگ له‌ كۆنگره‌یه‌كی رۆژنامه‌وانی هاوبه‌شدا رایگه‌یاند: "كۆریای باكوور به‌هۆی ئه‌و تاقیكردنه‌وانه‌ی له‌ سه‌ره‌تای مانگه‌وه‌ له‌سه‌ر مووشه‌كی بالیستیكی له‌ژێر ده‌ریادا ئه‌نجامی ده‌دات پابه‌ندبوونه‌كانی نێوده‌وڵه‌تی پێشێل ده‌كات.

له‌ چوارچیوه‌ی بڕیاره‌كانی ئه‌نجوومه‌نی ئاسایشی نێوده‌وڵه‌تی، په‌ره‌پێدانی ته‌كنه‌لۆجیای مووشه‌كی بالیستیك له‌سه‌ر كۆریای باكوور قه‌ده‌غه‌ كراوه‌. له‌ كۆبوونه‌وه‌كه‌دا، كیری باسی له‌ كوشتنی لێپرسراوانی كۆریای باكووری كرد به‌ فه‌رمانی كیم جۆنگ ئونی سه‌رۆكی ئه‌و وڵاته‌ و ئه‌و هه‌واڵانه‌ی به‌ نامۆ، تۆقاندن و ده‌رئاسا ناوزه‌ند كرد.