محەممەد جەواد زەریف، وەزیری دەرەوەی ئێران وەک کاردانەوە بەرامبەر ئەو ناڕەزایەتییانەی بەرامبەر رۆڵی ئێران لە ناوچەکەدا هەن، رایگەیاند ئێران نایەوێت خۆی بە سەر ناوچەکەدا زاڵ بکات و لە ئاست و سنوری جوگرافی ئێستای خۆی زۆر رازییە.

وەزیری دەرەوەی ئێران، لە هەڤپەیڤینی لەگەڵ هەفتەنامەی شپیگڵی ئەڵمانی لەگەڵ ئەوەی گەشبینی خۆی بە رێککەوتنی ئەتۆمی لەگەڵ وڵاتانی 5+1 پێشان داوە گوتووشیەتی "دانوستاندنەکان بە شێوەیەکی جددی بەردەوامن و کاتێک لایەنەکانی دانوستاندن جددیین، ئەگەری گەیشتن بە رێککەوتن زۆرە".

ئاماژەی بەوەش داوە کە سعودیە شەپۆلێکی دژایەتی لە ئاست ئێران دەستپێکردووە و "وادێتە پێش چاو کە هەندێک لە وڵاتانی ناوچەکە هەراسان بوون، بەڵام پێویست بەو ترسە ناکات و ئێران نایەوێت خۆی بە سەر ناوچەکەدا زاڵ بکات و لە ئاست و سنووری جوگرافی ئێستای خۆی زۆر رازییە".







رووداو