ژمارەی قوربانییانی بوومەلەرزەکەی نیپاڵ بۆ 1800 کەس بەرزبووەوەو تائێستاش لە زۆر ناوچە گەڕان بە دوای قوربانییان بەردەوامە.

بەگوێرەی زانیاریی وەزارەتی ناوخۆی نیپاڵ، کە ئەمڕۆ یەکشەممە بڵاویکردووەتەوە، تا ئێستا بەهۆی بوومەلەرزەکە 1805 کەس گیانیان لەدەستداوە و هەزارانی دیکەش برینداربوون. هاوکات بەرپرسانی نیپاڵ رایانگەیاندووە پێشبینیدەکرێت رێژەی قوربانییان بەرزتربێتەوە، چونکە بەشێکی قوربانییەکان لەژێر باڵەخانەکاندا ماون.

زۆربەی وڵاتانی جیهان ئامادەیی خۆیان نیشانداوە بۆ بەهاناوەچوونی خەڵکی نیپاڵ و هاوکاریکردنیان لە تێپەڕاندنی ئەو کارەساتە سرووشتییە. هەریەک لە رێکخراوەکانی خاچی سووری نێودەوڵەتی و مانگی سووریش لەگەڵ رێکخراوەکانی ئۆکسفامی خێرخوازی و پزیشکانی بێ سنوور رایانگەیاند تیمی فریاگوزاری دەنێرنە نیپاڵ بۆ بەهاناچوونی خەڵک.

پێشنیوەڕۆی رۆژی شەممە 25ی نیسانی 2015، بوومەلەرزەیەکی بەهێز بە گوڕی 7.9 بە پێوەری رێختەر، وڵاتی نیپاڵی هەژاند و وێرانییەکی زۆری لە شاری کاتماندۆی ئەو وڵاتە دروستکرد. لە ٨٠ ساڵی رابردوودا ئەم بوومەلەرزەیە خراپترین بوومەلەرزەیە لەو وڵاتەی دابێت. پێشتریش لە ساڵی ١٩٣٤دا، بوومەلەرزەیەکی تووند بە پلەی ٨ ی رێختەر، شاری کاتماندۆ و ناوچەکانی ئیتافی لە نیپاڵ، بە تەواوی وێران کرد.










رووداو