29ی‌ ئایار/ مایۆ (گوڵان میدیا)- فەرماندەی گشتی پۆلیسی ئێران رایگەیاند كە نەیارانی ئێران چاویان لە هەڵبژاردنی ئەمساڵی ئێران و پێیان وایە كە لە هەڵبژاردنەكانی ئەمساڵیشدا كێشە و ئاژاوە روو دەدات و بارودۆخی ئێرانیش ئاڵۆز دەبێت.

لەمبارەیەوە ئاژانسی فارسی ئێرانی بڵاویكردۆتەوە كە فەرماندەی گشتی پۆلیسی ئێران ئیسماعیل ئەحمەدی موقەدەم لە میانەی گوتارێكدا لە تاران باسی ئەوەی كردووە كە نەیارانی ئێران پلانیان بۆ ئەوە داناوە كە لە هەڵبژاردنەكانی ئەمساڵیشدا ئاڵۆزی و ناكوكی بخەنە نێو خەڵكی ئێرانەوە تا بەمجۆرە بگەنە ئارمانجەكانی خۆیان.

ناوبراو باسی ئەوەی كردووە كە ئەمساڵ هیچ جۆرە پلانێكی دژ بە كۆماری ئیسلامی ئێران شانسی سەركەوتنی نییە چوونكە بە پێچەوانەی ساڵانی رابردوو ئەم ساڵ لە سەرانسەری ئێران زیاتر لە 300 هەزار پۆلیس و هێزی ئەمنی لە یەك رۆژدا دەست بە پاراستنی ئاسایشی هەڵبژاردنەكان و باری ئەمنی دەكەن و دەرفەت بە هیچ جۆرە ئاژاوە گێڕی و نانەوەی ناكوكی نادەن.