Yekitiya Niştimanî ya Kurdistanê (YNK), ji bona razîkirina Tirkiyê çalakiyên PKKê li devera Kesk qedexe kir.

Di heyama borî de YNKê gelek caran hewl daye Tirkiyê razî bike û bi vî rengî pêwendiyên xwe bi Enqerê re xweş bike lê Tirkiyê gelek merc danîne pêşiya wê.

Li gorî agahiyên BasNewsê, Tirkiye herî zêde ji wê yekê aciz e ku YNK firsendê dide çalakiyên PKKê li devera Kesk. Lê YNKê di civînên veşartî li gel rayedarên Tirkiyê de soz daye wan xeletiyên xwe rast bike!

Di çarçoveya wan hewl û sozan de, cîgirê serokê hikûmetê û kurê Mam Celal, Qubad Talebanî biryar daye êdî partî û dezgehên nêzîkî PKKê li devera Kesk, bi hêceta ku mohleta wan kar nîne, bên girtin û çalakiyên wan jî bên qedexekirin.

Ew fermana Qubad Talebanî dê di nav 24 saetan de pêk were û eger ew partî û dezgehên han di wê heyamê de çalakiyên xwe nedin sekinandin, dê bên cezakirin.

Yek ji wan partiyên siyasî yên ku bê mohlet li Silêmaniyê û devera Kesk kar dike, Tevgera Azadî ye ku tê gotin baskê PKKê yê Başûrê Kurdistanê ye.

Basnews