Şiwêrmendê civata ewlekariya Kurdistanê Mesrûr Barzanî li gel firakisyona partiya demokrata Kurdistanê ya li parlementoya Kurdistanê civiya û daxwaz ji parlementeran kir ku li gor baweriya ku xelkê bi wan daye tevbigerin.

Di civînê de Mesrûr Barzanî hevdem li gel pêşkêş kirina pîrozbayiyan, çend şîret jî pêşkêşî parlementeran kir û balkêşande ser encamên her du hilbijartinên parlementoya Îraq û parlementoya Kurdistanê û ragihand ku, rêjeya zêde ya dengên PDKê dengvedana kar û bername û xelata xelkê ye bo bernameyên siyasî, abûrî û civakî yên PDKê û got; Ev yek cêyê serfiraziyê ye û pişta me bi vê baweriya han germe.

Di berdewamiya gotinên xwe de Mesrûr Barzanî behsa erkên parlementeran kir û ragihand ku erkên gelek giran li ser estûyên wene, jiber ku lazime di vê xola niha ya parlementoyê de pergalek were bicîhkirin ku xizmeta Kurdistaneke bihêz bike û got: Mezintirîn soz jî rastgûyiye.

Barzanî di beşeke din ji axaftinên xwe de behsa jiyana pêşmerge û malbetên serfiraz yên şehîdan kir û anî ziman ku lazime di vê xolê de karên zêdetir bo asûdeyiya jiyana pêşmerge û sarêj kirina birînên malbetên şehîdan bikin û got: Lazime ev babeta han di ewleviyeta karên we debe, ev yek ne xêr kirine belkû jiber vê yekê ye ku pêşmerge sedemê man û berdewam bûna gelê Kurdistanê ye û ev yek jî pirensîbeke mayindeye.

Mesrûr Barzanî behsa rêbaza Barzanî, lêbûrîn, hevûdu qebûlkirin, yekdengî û bihevre jiyana aştiyane kir û tekez kir ku lazime hun nunerê rastîn ya daxwaz û pêdiviyên xelk û bîr û bawer bin.

Barzanî di beşeke din ji gotinên xwe de behsa erkên tevahiya aliyan kir û ragihand ku tevahiya me xudanên Kurdistanê ne û got; Lazime hewl were dayîn bo ji nav birina çanda cuda kirina welatiyan û desthilatê û lazime karê me razî kirina xelkê be ne razî kirin ew û vî. Mesrûrû Barzanî got: Partî tevgereke cemaweriye bo bidest xistina maf, jiyaneke baş û xweşgozeranî bo gelê Kurdistanê.

Peyvîn li ser dadweriya civakî beşeke din bû ji gotara Mesrûr Barzanî û ragihand ku lazime derfetên yeksan û hevbeş bo her kesî bêyî cudatî werin afirandin û lazime weke desthilata zagonsaziyê û çavdêrî kirina desthilata cîhbicîhkar di tevahiya karên xwe de li gel tevahiya parlementeran hemahengî bikin jiber ku tişta ku heye parlementoya Kurdistanê ye û bi dengê xelkê Kurdistanê hatiye damezrandin û emanetek li ser estûyê we deye.