Wezareta Rewşenbîrî û Ciwanan a hikûmeta Herêma Kurdistanê, li hember rêzefîlma ku di kanala televîzyona ATV ya Tirkiyê de sivikayê û heqaret li kurd û Herêma Kurdistanê kiribû bi daxuyaniyekî nerazîbûn nîşan da û ew reftar wek dijminane pênase kir.

Îro 08.06.2022yê Wezareta Rewşenbîrî ya hikûmeta Herêma Kurdistanê daxuyaniyekî ve nerazîbûn li hember wê rêzefîlma Tirkiyê ya sivikayî bi kurd û hêmayên netewî û niştimanî yên Kurdistanê kiribû nîşanda û ragehand: ‘’Yalniz Kurd ango Gurê Bitenê behsa dîroka Tirkiyê û şerê navbera Tirkiyê û PKKê dike. Herwaha behsa guhertinên li navçeyê û rola Amerîkayê dike. Di gelek beşên din de bi henaseyekî dijminane behsa kurd û Herêma Kurdistanê dike û hemû kartan têkel yek dike û heta digehe asta têkel kirina li gel DAIŞ a terorîst jî. Bo nimûne di beşa 19ê de ku roja 03.06.2022yê hat weşandin de, di dîmenekî de behsa dadgeh kirina tirkekî ku li dadgeha Herêma Kurdistanê tê darizandin dike û di dadgehê de Ala Kurdistanê û wêneyê Serok Mesûd Barzanî hatiye danîn, sivikatiyê bi xebat û hêmayên gelê kurd dike û hikûmeta Herêma Kurdistanê wek nerewa pênase dike û dibêje erdnîgariyek bi navê Kurdistanê tine. Mûsil û Kerkûk du bajarên Tirkmenan in û şeqama herî mezin a Hewlêrê jî navê wê Muzafereddîn Gokboru ye ango amaje dike ku Hewlêr jî bajarekî Tirkmenan e.

Di beşeke din a daxuyaniya Wezareta Rewşenbîrî de tê gotin: ‘’Herêma Kurdistanê pêkhateyekî destûrî ya Iraqê ye. Axa pêkvejiyana olî û netewî ye. Konsolxaneya giştî ya Tirkiyê li Herêma Kurdistanê heye, sedan hemwelatî û şîrketên Tirkiyê li Herêma Kurdistanê kar dikin û berjewendiya hevbeş û cîranan kom dike li gel hemwelatiyên Kurdistanê û bi kurd û tirkmen, suryan û ereb û bi hemû ol û pêkhateyan ve kom dike.

Wezareta Rewşenbîrî û Ciwanan a Hikûmeta Herêma Kurdistanê dibêje: ‘’Li gel me ew rêzefîlme sivikatiyyê bi hemû wan rastiyan dike û ziyanê digehînê û dûre ji nirxên hunerî ku di bingeh de jî huner peyama aştî û pêkvejiyanê ye. Qebûl kirina cudayiyan e, ne ku rêgezperestî û şovenîstî û tine kirina yê hember e.

Wezareta Rewşenbîrî  behsa rêzgirtin li cudayiyan û pêkvejiyanê dike û dibêje: Baweriya me ya bi temamî heye ku pêwîste em hemû rêzê li cudayiyan bigrin û wek du cîran bi biratî pêkve bijîn. Herwaha hêvîdarin hikûmeta Tirkiyê jî rê li wê helmeta berevajî kirinê bigre ku ji aliyê hin xelkên xwedî kîn di dil û nijadperest ve tê kirin û hewl didin pêwendiyên di navbera gelan de aloz bikin.

Wezareta Rewşenbîrî dibêje, em dizanin ew rêzefîlm û rêzefîlmên din ên wekî wê, ku berê jî berhem hatibûn û ji bo razî kirina çîneke fikirteng e û derveyî ziyan gehandina nirxên cîrantiya baş û berjewendiyên hevbeş û bingehên mirovî û navnetewî yên pêwendiyên di navbera gelan de ti tiştekî din nikarin bi berhem bînin.

Wezareta Rewşenbîrî dibêje: Em nerazîbûna xwe digehînin saziya ew rêzefîlm berhem aniye û ATV û temamê karmendên wê fîlmê, ji ber sivikatî û belav kirina towê şovenîzmê û kêm dîtina yê hemberê xwe şermezar dikin.

 

Basnews