Berpirsê Nivîsîngeha Rizgarkirina Kurdên Êzdî Husên Qaidî ragihand, ku dayikek û 4 zarokên Kurdên Êzdî ji Sûriyê hatine rizgarkirin û di rojên pêş de dê bigihin Kurdistanê.



Husên Qaidî got: “Ew 5 kes xelkê navçeya Şingalê ne û roja 3ê Tebaxa 2014ê ji aliyê DAIŞê ve hatibûne revandin. Di rojên pêşiya me de em ê van kesan veguhezin Kurdistanê û dê bigihin melbatên xwe.”



Li gorî zanyariyan navê dayika hatiye rizgarkirin Xezal Elî ye û navê zarokên wê jî Hebîp, Elî, Samî û Dalya ne.



Hêjayê gotinê ye, ku roja 4ê Tebaxê jî keçekê bi navê Enwar Hemîd a ji gundê Koço ya Şingalê piştî 4 salan gihişte malbata xwe.



DAIŞê di êrîşa ser Şingalê de zêdetirî 6 hezar Kurdên Êzdî revandin. Heta niha jî çarenivîsa 3 hezar kesan nediyar e.

Rudaw