Serokwezîrê Iraqê û Serokê Hevpeymaniya Nesr Heyder Ebadî îro 28ê Nîsana 2018an bi mebesta bangeşeya lîsteya xwe ya ji bo hilbijartinên Parlementoya Iraqê li Kerkûkê ye.



Peyamnêrê Rûdawê Hîwa Husamedîn ji Kerkûkê ragihand ku "biryar bû serdana Heyder Ebadî roja yekşemê be û bangeşe li stada mezin were kirin, lê dibe ku rewşa keş û hewayê dema serdana Ebadî guhertibe û xistibin îro saet 10:00an.”



Di nav çar salên desthilata Ebadî de weke Sersokwezîrê Iraqê ev yekem car e serdana Kerkûkê dike, vê carê jî ji bo destpêkirina bangeşeya lîsteya xwe hatiye.



Ji bo Parlementoya Iraqê, li Kerkûkê 13 namzedên Hevpeymaniya Nesrê hene û yek ji namzedan jineke Kurd e, lê belê li gor gotina peyamnêrê me, “pêgeha lîsteya Ebadî, qasî pêgeha lîsteya Erebên Sunî û lîsteya Erebên Şîe ku hêza wan di nav Heşda Şeibî de heye, ne bihêz e”.

Rudaw