Serokomarê Tirkiyê Recep Tayyip Erdogan ragihand, hikûmeta wî welatî ji ber erdhejê 50 kamyon alîkarî şandine Başûrê Kurdistanê û dê li ser şandinê jî berdewam be.

Serokomarê Tirkiyê Recep Tayyip Erdogan, îro beriya ku biçe Rûsya, li firokexaneya Ataturk ya Stenbolê di civîneke çapemeniyê de behsa erdheja li Rojhilat û Başûrê Kurdistanê kir û hevxemiya xwe nîşan da.

Erdogan da zanîn ku hikûmeta Tirkiyê alîkarî şandine Herêma Kurdistanê û ragihand, di saetên destpêkê de 50 kamyon alîkarî bi rêya deriyê Xabûr-Îbrahîm Xelîl re derbasî Herêma Kurdistanê bûn, tîmên rizgarkirina sivîlan û dezgehên pêwendîdar bo alîkariyê hatine erkdarkirin.

Serokomarê Tirkiyê anî ziman ku dê li ser şandina alîkariyan bo Herêma Kurdistanê berdewam bin.

Li Başûrê Kurdistanê, ji ber erdhejê herî kêm 7 kes mirin û bi dehan kes jî birîndar bûn. Gelek kes jî ji ber erdhejê bê mal û avahî mane.

Basnews