Berdevkê Serokomariya Tirkiyê Ibrahîm Kalin amadebûna welatê xwe bo pêşkêşkirina hemû cure alîkariyan bo Herêma Kurdistanê ji ber erdheja îşev ragihand.

Ibrahim Kalin piştî erdheja bihêz a ku li Başûrê Kurdistanê çê bû, di peyameke twitterî de hevxemiya xwe nîşan da.

Ibrahîm Kalin li ser hesaba xwe ya Twitterê ragihand: “Ji ber sedema erdheja ku li bakurê Iraqê rû daye, AFAD, Heyva Sor û hemû yekîneyên me yên din ji bo çalakiyên lêgerîn û rizgarkirinê, derman, betanî û alîakriyên din ên mirovî di amadebaşiyê de ne.”

Wezîrê Tendirustiya Tirkiyê Ahmet Demircan jî tekezî li ser amadebûna Tirkiyê bo pêşkêşkirina alîkariyan bo Herêma Kurdistanê kir.

Ahmet Demircan got: “Li gorî daxwazên ku ji Bakurê Iraqê ve bihên, me her cure amadekariyeke xwe kiriye, em li bendê ne.”

Îşev erdhejek bihêz Başûrê Kurdistanê, Rojhilatê Kuridstanê û Îranê, Bakur û Rojavayê Kurdistanê, Iraq û Kuweyt hejand.

Ajansa fermî ya dewleta Îranê ragihandiye, li gorî Navenda Geofîzîk a Îranê navenda erdhejê li ser sînorê Îran û Iraqê û li bajarokê Ezgil a ser bi parêzgeha Kirmaşanê bûye û bihêziya wê jî 7.6 Rîxter bûye.

Rudaw