Parêzgarê Ormiyê di bersiva rexneyên derbarê rê nedan bi beşdariya kurd di vê parêzgehê de îdîa kir, ew li ser bingeha neteweperstiya tirk yan jî kurd kar nakin.

Parêzgarê Ormiyê Qurban Elî Seadet di bersiva pirsekê de ku gelo çima di rêvebirina parêzgeha Ormiyê de sûd ji rêvebirên kurd û reformxwaz nayê girtin, ji malperên Îranê re ragihandiye: “Em bi çavekê berê xwe didin hemû pêkhateyên parêzgeha Ormiyê û di birêvebirina vê parêzgehê de me nerînek etnîkî nîn e.”

Seadet herwiha gotiye: “Cem me hêjabûn take pîwan e ji bo destnîşankirina rêvebirên parêzghê”.

Li gor îdîayên parêzgarê Ormiyê, destnîşankirin û danîna berpirsan li vê parêzgehê li ser bingehîna etnîkî nîn e û tekez dike ku di wan demên dawî de, wan kurdekî xelkê parêzgeha Sine wek rêvebirê Rêvebiratiya Giştî ya Werziş û Lawan a vê parêzgehê diyar kiriye.

Li gor daneyên ne fermî, zêdetirî ji %60 ê rûniştvanên parêzgeha Ormiyê kurd in, lê piraniya kursî û berpisyaretiyên parêzghê di destê azerî yên li wê parêzgehê de ne.

Parêzgeha Ormiyê li Rojhilatê Kuridstanê ye û rûberê wê zêdetirî 42 hezar kîlometrî ye. Nifûsa parêzgehê jî li gor daneyên fermî yên Îranê zêdetirî 3 milyon û 400 hezar kesî ye.

Li tevahiya navçe û bajarên parêzgeha Ormiyê kurd dijîn û gelek bajar hene ku ji %100 rûniştvanên wan kurd in, lê ti bajarek li wê parêzgehê nîn e ku tenê azerî tê de akincî bin. Digel wê çendê de jî, hikûmeta Tehranê xwe nêzîkî azeriyan dike û piraniya rêveberî û kursiyan li parêzgehê dide azeriyan.

Rudaw