Hevserokê KCKê Cemîl Bayik ji ber çalakiyên PKKê yên salên 1990î, ji Almanyayê lêborîn xwest.

Cemîl Bayik di hevpeyvîneke hevbeş de digel televîzyonên WDR û NDR ên almanî, li ser çalakiyên PKKê yên salên 90î yên sedsala borî axivî û got, ez daxwaza lêborînê ji gelê Almanyayê dikim, ew çalakî êdî ti carî nayên kirin.

Bayik diyar kir ku ew êdî dewletek kurdî naxwazin û tenê ji bo çareseriyeke siyasî dixebitin û wiha got: “Em êdî naxwazin li dijî Tirkiyê şer bikin, êdî bes e. Bi şer ne em gihîştin armancên xwe ne jî dewleta Tirk.”

PKK di lîsteya terorê ya Amerîka û Ewropayê de ye lê Serokê Fraksiyona Partiya Sosyal Demokrat a Almanya (SPD) û Berdevkê Siyaseta Derve Rolf Mutzenich dibêje, eger mirov şerê PKKê li dijî DAIŞê û gotinên Cemîl Bayik bide ber hev wê çaxê divê rewşa PKKê ji nûve were nirxandin.

Li gorî wî parlamenterê Almanya, daxuyaniyên Cemî Bayik “dengekî nû” ye û firsendek e ji bo ku rewşa PKKê ji nûve were nirxandin û divê PKK jî xwe şer û tundiyê dûr bixe.

Di heyama salên 90î de, endam û alîgirên PKKê çalakiyên mîna rêgirtin û xweşewitandinê li Almanyayê pêk anîbûn.

Rudaw