هەر نێزیکبوونەک یان تێگەهشتنەک د ناڤبەرا دونالد ترەمپ و شی جینپینگ دا، نە بتنێ کار دکەتە سەر ئابوورێ جیهانی، بەلکو کارتێکرنا وێ درێژ دبیت بۆ دەڤەرێن ژ لایێ جیۆپۆلیتیکی ڤە هەستیار، و د پێشەنگی یا وان دا هەرێما کوردستانێ، ئەوا دکەڤیتە د دلێ هەڤسەنگی یێن د ناڤبەرا واشنتۆن، تاران، ئەنقەرە و بەغدایێ دا.

ئەگەر ئەڤ لووتکەیە ب راستی سەرکەفتبیت د کێمکرنا ئاستێ گرژی یا ناڤبەرا زلهێزان دا، پێدچیت ئێکەم مفادار هەرێما کوردستانێ بیت؛ چونکی هەرێم بلەز کارتێکرنا هەر ئالۆزیەکێ ل سەر دەردکەڤیت کو ب سەر دەڤەرێ دا بهێت، چ ب ڕێیا بهایێ نەفتێ بیت، یان مەلەفێ ئەمنی، یان ژی پەیوەندی یێن د ناڤبەرا ئەمریکا و ئیرانێ دا، هەر چەندە رۆژهەلاتا ناڤین بەر ب سەقامگیریێ ڤە بچیت، دەرفەتێن هەرێمێ بۆ بهێنکێشانا ئابووری و سیاسی پتر دبن.

قۆناغا بهێت رەنگە هێوربوونەکا ڕێژەیی د ململانێ یا ئەمریکی-ئیرانی دا بخۆ ڤە بگریت، ئەڤ چەندە ژی ب واتە یا کێمبوونا ئەگەرێن رووبەڕووبوونەکا سەربازی یا بەرفرەهـ دهێت، کو گەف ل سەر عیراقێ و هەمی دەڤەرێ دکر، هەر وەها هەر سەقامگیریەک د گەری یا هورمز و بازارێن وزەیێ دا دێ ب شێوەیەکێ راستەوخۆ کار کەتە سەر دۆخێ دارایی یێ هەرێمێ، ب تایبەت کو ئابووری یا وێ ب ڕێژەیەکا مەزن گرێدایی نەفت و بازرگانی یا هەرێمی یە.

بەلێ ل لایێ دی، ئەڤ تێگەهشتنێن نێڤدەوەتی ڕەنگە رویەکێ دی یێ هەستیارتر نیشان بدەن، زلهێز دەما ل سەر برێڤەبرنا بەرژەوەندی یێن خۆ ڕێکدکەڤن، زۆربەی جاران کێشە یێن بچووک پەراوێز دکەن، ئەڤە وێ چەندێ دگەهینیت کو مەلەفێ کوردی ڕەنگە وەک پێشینە ل دەڤ واشنتۆن نەمینیت وەک د قۆناغێن چوین و و دەربازبوویی دا، چونکی ئەمریکا پتر یا لایەنگرە بۆ ڕاگرتنا هەڤسەنگیان نەکو دروستکرنا ململانێ یێن نوی.

سەبارەت چینێ، ئەو ب چاڤەکێ تمام ئابووری تەماشەی کوردستانێ دکەت، پەکین گرنگیێ ب وزە، پێگەیێ جوگرافی و سەقامگیری یا بازرگانی ددەت، بەلێ ئەوێ نەڤێت بچیتە د ناڤ ئاڵۆزی یێن ململانێ یا نەتەوەیی یان سەنگەربەندی یێن سیاسی دا، ژ بەر هندێ، ڕەنگە د پاشەرۆژێ دا ئەم ل بەندا هەبوونا ئابووری یا مەزنتر یا چینێ بین د ناڤ هەرێمێ دا، بەلێ ب بێ چەترەکا سیاسی یا ڕوون.

د سێبەرا ڤان گوهۆڕینان دا، ڕەنگە ئیران ژی بزاڤێ بکەت هەژموونا خۆ د ناڤ عیراقێ دا ب شێوازێن هێمنتر ڕێکبێخیتەڤە، ب مفا وەرگرتن ژ هەر تێگەهشتنەکا نێڤدەوڵەتی کو ڕێگریێ ل پێکدادانا ڕاستەوخۆ دگەل وێ دکەت، ل ڤێرێ هەستیاری یا قۆناغێ بۆ هەرێمێ دیار دبیت، چونکی فشارێن بهێت دێ پتر سیاسی، ئابووری و ئەولەهی بن نەک سەربازی.

کورتی یا ئاخافتنێ، لووتکە یا ترەمپ و پینگ ڕەنگە دەرفەتەکا سەقامگیری یا کاتی بدەتە هەرێما کوردستانێ، بەلێ د هەمان دەم دا ڕاستیەکا گرنگ دوپات دکەت، کو جیهان بەر ب قۆناغا بەرژەوەندییان دچیت نەک سۆزێن سیاسی، ژ بەر هندێ، پاشەرۆژا هەرێما کوردستانێ بتنێ ب پەیوەندی یێن دەرەکی ڤە گرێدایی نابیت، بەلکو دێ گرێدایی شیانا وێ بیت بۆ ئاڤاکرنا ئابوورەکێ ب هێز، دامەزراوە یێن جێگیر، و دیتنەکا ناڤخۆیی یا ئێکگرتی کو بشێت سەرەدەریێ دگەل جیهانەکا بلەز دگۆڕینێ دا بکەت.