حاكم عادل مەلا ساڵح، ئەندامی مەكتەبی سیاسیی حزبی سۆسیال دیموكراتی كوردستانە و یەكێكە لەو سیاسەتمەدارانەی بە دید و تێڕوانینێكی كوردستانی و نیشتمانییەوە ڕووداو و پێشهاتەكان هەڵدەسەنگێنێت. لە گفتوگۆی ئەم جارەی «بازنەی گفتوگۆ»دا (كوردستان لەناو گێژاوی شەڕێكی نەخوازراودا)، بەم جۆرە دیدوتێڕوانین و پێشنیارەكانی خۆی خستەڕوو.

 

سەرەتا خۆشحاڵم كە جارێكی دیكە لە دەوری یەك مێز لەگەڵ ئێوەی بەڕێز و خۆشەویست و كۆمەڵێك لە دەستەبژێری سیاسیی خاوەن ئەزموون و ڕۆشنبیری كوردستان و عێراق كۆ دەبینەوە، بۆ تاوتوێكردنی پرسە گەرم و هەنووكەییەكانی كوردستان و ناوچەكە لەژێر ناونیشانی (كوردستان لەناو گێژاوی شەڕێكی نەخوازراودا). وێڕای ستایشی بێپایانم بۆ هەوڵە بەردەوامەكانتان لەپێناو خولقاندنی ئەم جۆرە كەشە دیالۆگییانە، ئەمەوێت بە ڕاشكاوی ئاماژە بەوە بدەم، كە ئێستا ئێمە لەناو جەرگەی بارودۆخێكی زۆر ئیستسنائی و هەستیارداین. بارودۆخێكی نەخوازراو كە تێیدا ئاگر و دووكەڵی شەڕێكی نامۆ بە یاسا و ڕێساكانی جەنگ و میساقی نەتەوە یەكگرتووەكان لە ناكاو و ناڕەوا، تەواوی ناوچەكەی گرتووەتەوە. ئێمەش وەك نەتەوەیەكی ڕەسەن، دێرین و خاوەن پێگەیەكی قورس لە هاوكێشە ناوچەییەكاندا، بە ناچاری ڕووبەڕووی لێكەوتە مەترسیدارەكانی ئەم شەڕە نەخوازراوە بووینەتەوە و كاریگەرییە نێگەتیڤەكانی لە بوارەكانی مرۆیی و ئابووری و ئەمنی لەسەر ئێمە و ناوچەكە و ڕۆژهەڵاتی ناوین و جیهان بەگشتی دەركەوتووە و هەر وا لە هەڵكشاندایە.

ئەم شەڕە هی ئێمە نییە و ناشبێ خۆمانی تێوە بگلێنین، چونكە نە بەرگەی دەگرین و نە دەشتوانین یاری لە نێوان هەر دوو جەمسەری جەنگەكەدا بكەین. مێژووی خوێناویی ناوچەكەمان پێمان دەڵێت، ئەم جۆرە ململانێ چەكدارییە گەورانە جگە لە ماڵوێرانی، نەهامەتی و تێكچوونی باری تەناهی و سەقامگیری و ئاشتی و ئاسایش بۆ گەلانی ناوچەكە، و بەتایبەتیش بۆ گەلی كورد، هیچ پەیامێكی دڵخۆشكەر و گەشبینانەیان پێ نییە و تەنیا برینەكانمان لە جاران قووڵتر دەكەنەوە. ئەوەی لای من جێگەی سەرنج و مایەی گفتوگۆی جددییە، ئەوەیە كە سەرەڕای ئەوەی شەڕ لە چوار دەورمان دەگوزەرێ و جەنگێكی گەورە هەڵگیرساوە و یەخەی هەمووانی گرتووە، كەچی بەداخەوە تەنیا ئێمەین كە وەك كورد هیچ ستراتیژ و پلانێكی نیشتمانیی تۆكمە و دوورمەودامان بۆ ڕووبەڕووبوونەوەی ئەم گۆڕانكاری و ئالنگارییانە نییە.

سەرنج بدەن، لە كاتێكدا سەرۆكی زلهێزترین وڵاتی جیهان پەیوەندی بە بەڕێز سەرۆكی هەرێمی كوردستانەوە دەكات، لە ئەمریكاوە تا ئەوروپا و وڵاتانی ناوچەكە كە باسی شەڕەكە دەكرێت، ڕاستەوخۆ باسی كورد و هەرێمی كوردستان دەكرێت، كەچی ئێمە خۆمان بێ هیچ پلان و ستراتیژێك لە جەوهەری بابەتەكە خۆمان بێ ئاگا كردووە. نەبوونی گوتارێكی یەكگرتووی كوردستانییانەی پێشوەختە بۆ ئەم جەنگە، كێماسییەكی گەورەی سیاسی و ستراتیژییە كە ناتوانرێت چاوپۆشی لێ بكرێت. ناكرێت ئێمە تەنیا تەماشاكەر بین، چونكە ئەم جەنگە و پێشهات و دەرهاوێشتەكانی پێویستی بە یەكدەنگی و كارنامەیەكی نیشتمانیی ڕوون هەیە، كە تا ئێستا بەپێی پێویست لە ئارادا نییە، یان هەستی پێناكرێت. پێویستە ئەم گفتوگۆیانە ببنە هەوێنی داڕشتنی ڕێگەیەكی دروست بۆ پاراستنی بەرژەوەندییە باڵاكانی نەتەوەكەمان لەم گەردەلوولە وێرانكەرەدا، كە دوور لە خواستی خۆمان گەلانی ناوچەكەی گرتووەتەوە.

دەبینین لە ماوەكانی ڕابردوودا لایەنە شیعەكان بە تەواوی دەركیان بە قەبارەی ئەو مەترسییە گەورانە كرد كە ڕووبەڕووی عێراق بوونەتەوە، هەر بۆیە بۆ كۆتاییهێنان بەو پشێوییەی پێشووتر و ڕێكخستنەوەی ڕیزەكانیان «چوارچێوەی هەماهەنگی»یان وەك چەترێكی سیاسی دامەزراند. لە هەمان كاتدا، لایەنە سوننەكانیش بە هەستكردن بەو بارودۆخە سیاسی و ئەمنییە ناهەموارەی كە لە ناوچەكەدا دەگوزەرێت، هەستان بە پێكهێنانی «ئەنجومەنێكی سیاسیی باڵا» بۆ یەكخستنی هەڵوێستەكانیان. كەچی جێگەی داخێكی زۆرە كە لێرەدا تەنیا ئێمەی كورد بەو شێوازە پەرتەوازە و پەرشوبڵاوییە كەوتووینەتە نێو بەرداشی جەنگێكی گەورەی هەرێمایەتی، كە ئەمە دیسانەوە بە كێماسییەكی ستراتیژیی گەورە و هەڕەشەیەكی جددی بۆ سەر پاشەڕۆژمان هەژمار دەكرێت. ئێمە تا ئەم چركەساتەش نەمانتوانیوە ببینە خاوەنی یەك گوتاری نیشتمانیی یەكگرتوو، كە گوزارشت لە خواستی هەموو تاك و لایەنەكانمان بكات، بەڵام لەگەڵ هەموو ئەمانەشدا خاڵێكی دڵخۆشكەر هەیە كە پێویستە ئاماژەی پێ بدەین، ئەویش ئەوەیە كە توانیومانە جۆرێك لە «بێلایەنیی ئەرێنی» تا ئێستا بپارێزین.

 پاش تێپەڕبوونی زیاتر لە مانگێك بەسەر هەڵگیرسانی ئەم جەنگە وێرانكەرەدا، دەتوانین بڵێین كورد تا ئێستا زۆر بە ژیرانە هەنگاوی ناوە و كارێكی لۆژیكی و ژیرانەمان كردووە، بەوەی كە نەبووینەتە بەشێك لەم جەنگە، یان لایەنگری یەكێك لە جەمسەرەكانی ململانێكە بین، بەڵام دەبێت ئەو ڕاستییەش بزانین كە مانەوەمان بەم شێوەیەی ئێستا و لەژێر ئەم هەموو فشارەدا، كارێكی زۆر قورس و تاقەت پڕووكێنە.

 ئێمە بەرژەوەندیی هاوبەش و مێژوویەكی دوور و درێژمان لەگەڵ هەردوو لایەنی شەڕەكەدا هەیە، بەتایبەتی لە گەڵ كۆماری ئیسلامیی ئێران كە لە سەردەمی كیمیابارانی هەڵەبجە و جینۆسایدی گەلەكەمان و كۆڕەوی جەماوەری كوردستاندا دەروازەكانیان بۆ كردینەوە، و لە شەڕی داعشیشدا فریا كەوتن، ئەوە سەرباری نزیكایەتیی ئایینی و كەلتووری و فەرهەنگی و جوگرافی و مێژوویی، بەڵام هیچ شتێكی هاوبەش لە نێوان ئێمە و ئیسرائیلدا نییە و تەنانەت بەپێی دەقی ئایینەكەشمان وەك گەلێكی موسڵمان نابێت دۆستایەتیشیان بكەین.

پاراستنی ئەم بێلایەنییە و تێپەڕاندنی ئەم قۆناغە، پێویستی بە حیكمەت، عەقڵانییەت و دیراسەتێكی قووڵتری سەركردایەتیی سیاسیی كورد و حكومەتی هەرێمی كوردستان هەیە، كە بێگومان هەر ئەوەشیان لێ چاوەڕوان دەكرێت بۆ پاراستنی دەستكەوتەكانمان، كە بەرهەمی خوێنی شەهیدانمانە.

كورد تا ئێستا باشی هێناوە و لەبەر پێگە ستراتیژییەكەی دەتوانێت هاوسەنگیی هێز بگۆڕێت، بەڵام نابێت ئەوەمان لەبیر بچێت كە ئێمە تەنیا ژمارەیەكین لە ناو كایە سیاسییەكەدا و لە ڕووی ماددی و مرۆییەوە بەرگەی لێكەوتەكانی ئەم شەڕە گەورەیە ناگرین، بەتایبەتی لە كاتێكدا هیچ ئەلتەرناتیڤێكی باشتر بۆ ناوچەكە نەخراوەتە ڕوو، یان هەر لە بنەڕەتدا نییە.

بۆیە ئەركی سەرەكیمان ئەوەیە هەتا دەكرێت كار لەسەر پارێزگاریكردن لەم بێلایەنییە و بەهێزكردنی ناوماڵی كوردی بكەین، تاوەكو بتوانین لەم گەردەلوولە بە سەلامەتی دەرباز بین و گەلەكەمان لە ماڵوێرانی بپارێزین. ئەم قۆناغە پێویستی بە یەكڕیزیی ڕاستەقینە و دووركەوتنەوە لە بەرژەوەندییە تەسكە حزبییەكان هەیە لە پێناو بەرژەوەندییە باڵاكانی نیشتماندا، چونكە تەنیا بە یەكهەڵوێستی دەتوانین پێگەی خۆمان لە هاوكێشە نوێیەكاندا بچەسپێنین و ڕێگە نەدەین خاكی كوردستان ببێتە مەیدانی یەكلاكردنەوەی ململانێی وڵاتانی زلهێزی جیهانی و ناوچەكەش. ئەم هەستیارییەی ئێستا دەمانخاتە بەردەم بەرپرسیارێتییەكی مێژوویی كە پێویستە هەموو تاكێكی كورد و سەرجەم هێزە سیاسییەكان بە ئاراستەی چارەسەری ئاشتییانەدا كار بكەن، نەك بە ئاراستەی تێوەگلان و قووڵكردنەوەی كێشەكان.

 هیوادارم ئەم هەڵوێستە ژیرانەیە سەرەتایەك بێت بۆ گەیشتن بە ستراتیژێكی نەتەوەیی و نیشتمانی، كە لە ئاست قوربانیدان وتێكۆشان و بەرخۆدانی مێژووی پڕ لە شانازی گەلەكەماندا بێت. لە سەرەتای دەستپێكردنی ئەم جەنگە گەورەیەدا، تێبینیی دژبەرییەكی زۆر لە لێدوانەكانی بەرپرسانی كۆشكی سپیدا دەكەین سەبارەت بە ئامانجە ستراتیژییەكانیان. لە سەرەتای شەڕەكەدا بە ڕاشكاوی ڕایانگەیاند كە ئامانجی سەرەكییان گۆڕینی ڕیشەیی سیستمی سیاسی و ڕووخاندنی ئێران و ئازادكردنی گەلانی ئێرانە، بەڵام دوای دوو هەفتە ئەم ستراتیژە گۆڕدرا و تەنیا جەخت لەسەر لاوازكردن و بێهێزكردنی توانا سەربازی و ناوكی و مووشەكییەكانی تاران كرایەوە. كەچی لە ئێستادا ئامانجەكان دابەزێنراون بۆ تەنیا پاراستنی ئاسایشی كەشتیوانیی نێودەوڵەتی لە گەرووی هورمز، یان لێدان لە ژێرخانی وزە و بڕینی كارەبا و ڕووخانی چەند پردێك. لە كۆتا هەڵوێستیشدا بەپێی ڕاپۆرتێكی ئەمریكی لە ڕۆژنامەی «وۆڵ ستریت جۆرناڵ» دەبیستین كە ئامادەن بۆ هەر جۆرە دانوستانێكی سیاسی، تەنانەت ئەگەر گەرووی هورمز بە داخراویش بمێنێتەوە، بە واتایەكی دی، دەتوانین بڵێین ئەمریكا بە دوای دەرەچەیەكدا دەگەڕێ بۆ دانوستان و ڕاگرتنی جەنگەكە، بەڵام ڕەنگە ئیسرائیل خوازیاری دانوستان نەبێت و ئەمریكاش بە ئاشكرا كەوتووەتە ژێر كاریگەری جوولەكە و قەوارەی زایۆنی، ئەم گۆڕانكارییە خێرایانە لە هەڵوێستی كۆشكی سپیدا نیشانەی تەمومژاویبوونی ستراتیژیەتەكانە لە ناوەندی بڕیاردانی ئەمریكادا.

ئەم ناڕوونییە لە ناو كۆشكی سپیدا بووەتە هۆی سەرهەڵدانی كۆمەڵێك پێشهاتی سیاسیی جیاواز. كارۆلین لیڤێت وەك گوتەبێژی فەرمیی كۆشكی سپی و خودی دۆناڵد ترەمپیش، ئاماژە بەوە دەدەن كە هاوپەیمانیی «ناتۆ» لەم جەنگەدا پشتیوانیان نەبووە، بۆیە پێویستە لە ئایندەیەكی نزیكدا وڵاتانی جیهان خۆیان بەرپرسیارێتیی پاراستنی كەشتییە نەوتییەكانیان بگرنە ئەستۆ و ئەمریكا چیتر ئامادە نییە ئەو بارە قورسە بە تەنیا بۆ ئەوروپا هەڵبگرێت.

هاوكات، لە چەند ڕۆژی ڕابردوودا بینیمان ملیۆنان هاووڵاتی ئەمریكی هاتنە سەر شەقام دژی سیاسەتەكانی ترەمپ و ئیسرائیل و دژایەتییان بۆ ئەم جەنگە ڕاگەیاند، ئەمەش وای كردووە، گوتاری سەرۆك ترامپ گۆڕانكاریی جەوهەریی بەسەردا بێت، و ئامانجەكانی لە چاو سەرەتادا زۆر جیاوازتر و نزمتر بن.

دووبارەی دەكەینەوە، ئەم جەنگە بە هیچ شێوەیەك جەنگی ئێمە نییە و هیچ بەرژەوەندییەكی نەتەوەیی تێدا نابینین، كاتێك شەڕێك هی نەتەوەی ئێمە نەبێت، دەبێت هەموو هەوڵێك بدەین تا یەكگرتووانە مامەڵە لەگەڵ لێكەوتەكانیدا بكەین. بەداخەوە، ئێستا پەرتبوونێكی مەترسیدار لە گوتاری سیاسیی كوردیدا دەبینرێت و درزی سیاسیی نێوان لایەنەكان دیارە و پێویستە كار بۆ یەكخستنی ناوماڵی كوردی بكرێت، تا بتوانین بەرگری لەو دەستكەوتە مەزنانە بكەین كە بەرهەمی ڕەنج، فرمێسك و خوێنی زیاتر لە سەدەیەك خەبات، شۆڕش و ڕاپەڕینی گەلەكەمانن. پاراستنی قەوارەی هەرێمی كوردستان و پرسی میللەتەكەمان لە هەموو شتێك گرنگترە، ئەوەش ئەركێكی مێژوویی و نیشتمانییە كە دەكەوێتە ئەستۆی هەموو لایەنە سیاسییەكان و تەواوی خەڵكی كوردستان بەبێ جیاوازی. تەنیا بە یەكڕیزی دەتوانین پارێزگاری لە دەستكەوتەكانی ئێستا و ئایندەی پرشنگداری گەلەكەمان بكەین و ڕێگە نەدەین خوێنی ڕۆڵەكانمان لە پێناو بەرژەوەندیی بێگانەدا بڕژێت و قەوارە دەستوورییەكەمان بكەوێتە مەترسییەوە. دەبێت بە عەقڵێكی كراوە و ستراتیژێكی ڕوونەوە بەرەوڕووی ئەم تەحەددییانە ببینەوە و كار بۆ دۆزینەوەی دەرفەتەكان بكەین، چونكە پاراستنی سەقامگیری و ئارامیی خاك و خەڵكی كوردستان لەم قۆناغە سەختەدا، گرنگترین ئەولەوییەتی نەتەوەیی و نیشتمانیی ئێمەیە لەم ساتەوەختە هەستیار و پڕ لە گۆڕانكارییانەدا، كە ڕووبەڕووی تەواوی ناوچەكە بووەتەوە. بۆ نمونە ڕەنگە هەوڵی نەزۆكی ناحەزانمان هەبێت بۆ تێوەگلانی هەرێم، گوایە ئەوانە میلیشیا و گرووپی لەیاسا دەرچوون، بەڵام لێرەدا وەك یاساناسێك ڕاشكاوانە ڕایدەگەیەنم كە ئەوانە بەشێكن لە سیستمی بەرگریی عێراقی، كە كاتی خۆی لە ناو پەرلەمانی عێراقدا بە بەشداریی نوێنەرانی كورد دەنگیان پێ دراوە و شەرعییەتی یاساییان بۆ فەراهەم كراوە. واتە لە كاتێكدا ئێمە بە ناو چەندین پۆستی سیادیمان لە عێراقدا هەیە، كەچی ڕۆژانە ڕووبەڕووی هێرشی ناڕەوای درۆن و مووشەكی چەندین لایەنی عێراقی دەبینەوە. لێرەدا پرسیارە جەوهەرییەكە ئەوەیە كە كورد بۆچی لە بەغدادیە؟ یان كە دەزانێت ئەمە هەڵوێست و ڕەوشی عێراقە، بۆچی كورد پاشەكشێ لە پرۆسەی سیاسیی عێراق ناكات، لە كاتێكدا خول لە دوای خول سەنگ و پێگەی كورد لە پەرلەمان و حكومەتی عێراق كەم دەكات و ئەرزشی سیاسیمان وەك پێویست ڕێزی لێ ناگیرێت؟ با ئەمە یەكێك بوایە لە بژاردەكان.

  حزبی سۆسیال دیموكراتی كوردستان، وەك قەوارەیەكی سیاسیی شۆڕشگێڕ و نیشتمانی و نەتەوەیی خاوەن مێژوویەكی زێڕینی تێكۆشانە و پاش نزیكەی نیو سەدە لە قوربانیدان لە پێناو ئامانجە باڵاكانی گەلەكەمان، پڕۆژەیەكی ستراتیژیی گشتگیری ڕاگەیاندووە، ئەم پڕۆژەیەمان بە نووسراو لەژێر ناونیشانی «ئەنجومەنی باڵای بەرژەوەندییە نیشتمانی و نەتەوەییەكان» بۆ زۆرینەی لایەنە سیاسییەكانی هەرێمی كوردستان ناردووە، ئێمە لەو بڕوایەداین كە دامەزراندنی ئەم ئەنجومەنە لەم ساتەوەختەدا، بۆ ئەوەیە كە كوردیش ناوەندێكی یەكگرتووی بڕیاری هەبێت، كە لە ئێستادا زەرورەتێكی مێژوویی و حەتمییە بۆ پاراستنی قەوارەی هەرێمی كوردستان لە بەرانبەر ئەو گۆڕانكاری و ئالنگارییانەی كە بەهۆی پێشهاتە خێراكان و جەنگە نەخوازراوەكانی ناوچەكەوە هاتوونەتە پێش. لە ئێستادا چاوەڕوانی وەڵامی ئەرێنیی هەموو هێزەكانین بۆ ئەوەی پێكەوە بەرەو قۆناغێكی نوێی كاركردنی هاوبەش هەنگاو بنێین.

ئەم پڕۆژە نیشتمانییە دەبوو ببێتە تەوەری سەرەكیی ئەم كۆبوونەوەیە، چونكە ڕێك لەگەڵ ناونیشانی مێزگردەكەمان دەگونجێت، كە باس لە «كوردستان لە چوارچێوەی جەنگێكی نەخوازراو»دا دەكات. ئاشكرایە كە سەركەوتنی ئەم دەستپێشخەرییە، پێویستی بە كۆدەنگی و ئیرادەی جددیی هەموو حزبەكان هەیە تا ببێتە چەترێكی یەكگرتوو بۆ بڕیاردانی سیاسی. ڕاستییەكی حاشاهەڵنەگر هەیە، ئەویش ئەوەیە كە تا نەبینە خاوەنی ناوەندێكی بڕیاری هاوبەش، هەمیشە وەك لایەنە جیاوازەكان لە ژێر هەڕەشە و فشاری توندی وڵاتانی ئیقلیمی و دەوڵەتانی دراوسێدا دەمێنینەوە. نەبوونی یەكدەنگی وای كردووە، پێگەی هەرێمی كوردستان لەسەر ئاستی ناوخۆ، لە بەغدا و تەنانەت لە ناوەندە نێودەوڵەتییەكانیشدا، بە لاوازی و بێهێزی دەربكەوێت.

ئەگەر بتوانین ئەنجومەنێكی باڵای پارتە سیاسییەكانمان هەبێت، بە جۆرێك بەدیلی سەرۆكایەتیی هەرێمی كوردستان نەبێت، بەڵكو ناوەندێكی هاوكار و ڕاوێژكاریی دامودەزگا فەرمییەكانی كوردستان بێت و تیایدا كار بۆ بڕیارسازی و داڕشتنی پلانی ستراتیژیی دوور مەودا بكرێت، بێگومان كۆمەڵگەی نێودەوڵەتی و وڵاتانی ناوچەكە بە جددییەتێكی زۆرترەوە مامەڵەمان لەگەڵ دەكەن و حیساب بۆ قورسایی و سەنگمان دەكەن لە هاوكێشە هەرێمییەكاندا. پێكهاتەی ئەم ئەنجومەنە پێشنیاركراوە بە شێوەیەكی زانستی و پیشەیی داڕێژراوە و لە دوو دەستەی گرنگ پێكدێت: دەستەی یەكەم، كۆكردنەوەی توانا و شارەزایی پسپۆڕانی دەستوور و یاسا نێودەوڵەتییەكان، دیپلۆماتە دێرین و خاوەن ئەزموونەكان، لەگەڵ كەسایەتییە دیارەكانی بواری سیاسی و ئەمنی و ئابووری. ئەم نوخبەیە پاش تاوتوێكردنی وردی بارودۆخەكە، دیدگەیەكی گشتگیر و پڕۆژە بڕیارەكانی گەڵاڵە دەكات و دەیخاتە بەردەم دەستەی دووەم، كە ئەویش «دەستەی بڕیاردەری ئەنجومەن»ـە. بەم شێوەیە، هەر بڕیارێك دەربچێت، دەبێتە بڕیارێكی نیشتمانیی پەسەندكراو كە هەمووان پشتیوانیی دەكەن و كەس ناكەوێتە دەرەوەی بازنەی بەرپرسیارێتی و ئیدی دەرفەتی موزایەدەی سیاسیشی نامێنێت. ئەمە تەنیا دەرەچەیەكی لۆژیكیی هەنووكەییە بۆ ئەوەی گوتارێكی سیاسیی بەهێزمان هەبێت و بتوانین لەم دەریا پڕ لە شەپۆلەدا، كەشتیی پرسی كورد بەرەو كەنارێكی ئارام و سەقامگیر ببەین و مافە دەستوورییەكانمان لە هەموو جۆرە مەترسییەك بپارێزین. ئەم پڕۆژەیە چارەسەرێكی دەستەجەمعی و بەكۆمەڵە بۆ دەربازبوون لەم پەرتبوونە سیاسییەی كە ئێستا بەرۆكی هەرێمەكەمانی گرتووە و هەموو لایەكمانی خستووەتە بەردەم بەرپرسیارێتییەكی قورسی مێژوویی و نەتەوەیی بەرانبەر نەوەكانی داهاتوومان. پێویستە هەموومان بۆ ئەم ئامانجە باڵایە یەكدەنگ بین و بەرژەوەندییە گشتییەكان بخەینە پێش هەموو شتێكەوە، تا بەهێزتر لە جاران بمێنینەوە.

لە كۆتاییدا بە پێویستی دەزانم وەك هەنگاوی یەكەم كۆبوونەوەی گشتیی حزبە سیاسییەكان بەپەلە و بێ دواكەوتن ئەنجام بدرێت، بە ئامانجی یەكخستنی دیدگاكان و نزیككردنەوەی هەوڵەكان بۆ پێكهێنانی كابینەی دەیەمی حكومەتی هەرێمی كوردستان، چونكە لە پاش نزیكەی ساڵ و نیوێك لە ئەنجامدانی پرۆسەی هەڵبژاردنی پەرلەمانی كوردستان، نەك نەتوانراوە حكومەت پێك بهێنرێت، بەڵكو دەستەی سەرۆكایەتیی پەرلەمانیش هەڵنەبژێردراوە، كە ئەمەش لە كاتێكدا دژە بە سیستمی دیموكراسی و بەهاكانی، لە هەمان كاتدا ڕێزنەگرتنە لە دەنگی جەماوەری كوردستان و ئەنجامە فەرمییەكانی پرۆسەی هەڵبژاردن.