حكومەتی هەرێمی كوردستان لە مێژووی سیاسیی خۆیدا، هەمیشە پەیڕەوكردنی سیاسەتی بێلایەنیی وەك بنەمایەكی ستراتیژی بۆ پاراستنی بەرژەوەندییە باڵاكانی گەلی كورد ڕاگەیاندووە. بەڵام لە ئێستادا، ئەم قەوارە دەستوورییە ڕووبەڕووی تاقیكردنەوەیەكی سەخت بووەتەوە، لە لایەكەوە جەخت لە دوورەپەرێزیی خۆی لە ململانێ نێودەوڵەتییەكان دەكاتەوە، لە لایەكی دیكەشەوە بووەتە ئامانجی هێرشی بەردەوامی فڕۆكە بێفڕۆكەوانەكان و مووشەكە بالیستییەكان. ئەم دۆخە نەك هەر سەروەریی خاكی هەرێم دەبەزێنێت، بەڵكو مەترسییەكی ڕاستەوخۆیە بۆ سەر ئاسایشی نەتەوەیی و سەقامگیریی ناوچەكە.

پەیامی ڕوونی دەسەڵاتدارانی هەرێم، چ پێش شەڕی غەززە و چ دوای هەڵگیرسانی، هەمیشە پاراستنی ئاشتی و دووركەوتنەوە لە جەنگ بووە. لێرەدا پرسیارێكی جەوهەری سەر هەڵدەدات: ئایا بوارێك بۆ بێلایەنی ماوە كاتێك گرووپە لەیاسا دەرچووەكان دەیانەوێت بە زۆر هەرێمی كوردستان پەلكێشی ناو جەنگێك بكەن كە پەیوەندی بە بەرژەوەندییەكانی گەلی كوردەوە نییە؟ ئەو هێرشانە تەنیا ئامانجی سەربازی نین، بەڵكو هێرشن بۆ سەر ئیرادەی سیاسی و گەشەسەندنی هەرێم. نەیاران دەیانەوێت لە ڕێگەی نائارامكردنی ژینگەی هەرێمەوە، كەرتی پەروەردە، زانكۆكان و كەرتی گەشتیاری و ئابووری پەك بخەن. كاتێك بە هۆی هەڕەشەی درۆنەكانەوە دەرگای قوتابخانەكان دادەخرێن، ئەوە نیشانەی ئەوەیە كە دوژمنان قووڵایی ژیانی مەدەنیی هاووڵاتیانیان كردووەتە ئامانج.

یەكێك لە مەترسیدارترین گۆڕانكارییەكان لە یاساكانی شەڕدا، ئامانجگرتنی ڕاستەوخۆی هێزەكانی پێشمەرگەیە. پێشمەرگە كە هەمیشە هێزێكی پارێزەر و سەنگەری بەرگری بووە لە خاك، بەبێ هیچ پاساوێك دەكرێتە ئامانجی كارە تیرۆریستییەكان. ئەمە نەك هەر غەدرێكی مێژووییە، بەڵكو ئاماژەیەكی ڕوونە بۆ ئەوەی كە هاوپەیمانان و وڵاتانی دراوسێ وەك پێویست ئەركی خۆیان لە پاراستنی ئەم هێزە شەرعییەدا جێبەجێ نەكردووە. لێرەدا پێویستە هەرێمی كوردستان لەسەر ئاستی نێودەوڵەتی فشارەكانی چڕتر بكاتەوە بۆ ئەوەی پێشمەرگە لە ئامرازەكانی بەرگریی ئاسمانی و پاراستنی سەربازی بێبەش نەكرێت.

لەلایەكی دیكەوە، بەرپرسیارێتییەكی گەورە دەكەوێتە ئەستۆی حكومەتی فیدڕاڵیی عێراق. بەپێی دەستوور، بەغدا بەرپرسە لە پاراستنی سنوورەكان و پاراستنی هەموو پێكهاتەكانی عێراق. بێدەنگی، یان لاوازیی هەڵوێستی حكومەتی ناوەند بەرانبەر میلیشیاكان، شەرعییەتی دەوڵەتبوونی عێراق دەخاتە ژێر پرسیارێكی جددییەوە. وەك جەنابی سەرۆك ئاماژەی پێداوە، تەنیا «سەركۆنەكردن» چارەسەری ئەم فەوزایە ناكات. ئەگەر حكومەتی فیدڕاڵ نەتوانێت سنوورێك بۆ ئەم گرووپە سەركێشانە دابنێت، نەك هەر هەرێم، بەڵكو تەواوی پڕۆسەی سیاسی لە عێراقدا ڕووبەڕووی هەرەسپێهێنان دەبێتەوە.

لە كۆتاییدا، تاقە ڕێگەی ڕووبەڕووبوونەوەی ئەم پلانە چەپەڵانە، یەكڕیزی و یەكگرتوویی گەلی كوردستانە. پاراستنی هەرێم ئەركێكی ئەخلاقی، ئایینی و نیشتمانییە. پێویستە جەماوەری كوردستان بە ئیرادەیەكی بەهێزەوە پاڵپشتی لە قەوارەی هەرێم و هێزی پێشمەرگە بكەن.