سوپای ئیسرائیل ڕۆژی سێشەممە 16ی ئەیلول ئۆپەراسیۆنێکی زەمینی بۆ گرتنەوەی شاری غەززە دەستپێکرد، کە بە فەرمانی سەرۆکوەزیرانی ئیسرائیل بوو.

سەرچاوە فەلەستینییەکان، لە کاتژمێرەکانی یەکەمی ئۆپەراسیۆنەکەدا دەیان کەس کوژراون و وەزیری بەرگری ئیسرائیلیش بەیانی سێشەممە 16ی ئەیلول ڕایگەیاند، تا ئەو کاتەی ئەرکی هێزەکان تەواو نەبێت، ئیسرائیل کۆڵ نادات. هەروەها   ڕایانگەیاندووە، لەگەڵ جێگیرکردنی تانکەکان لەسەر شەقامەکانی غەززە، هەلیکۆپتەر و فڕۆکە بێفڕۆکەوانەکانی ئیسرائیل دەستیانکردووە بە هێرشکردنە سەر ناوچە جیاوازەکانی شارەکە.

سوپای ئیسرائیل ماوەی چەند هەفتەیەکە گەمارۆ و بۆردومانی دەرەوەی شارەکە دەکات و قەیرانێکی مرۆیی بەرفراوان لە کەرتی غەززە پەرەی سەندووە و ئاوارەبوونی بەکۆمەڵ و کەمیی خۆراک و ئاوی توندی لێکەوتووەتەوە.

وەزارەتی تەندروستی غەززە دەڵێت، ژمارەی ئەو فەلەستینیانەی لە سەرەتای هێرشەکانی ئیسرائیلەوە کوژراون گەیشتووەتە زیاتر لە 64 هەزار کەس و ڕێکخراوە نێودەوڵەتییەکان هۆشدارییان داوە کە بەشێک لە ناوچەکە ڕووبەڕووی برسێتی دەبێتەوە.

 

 

 

 

گوڵان: سەردار خەلیل