تەندرووستیی باش گەورەترین سامانی مرۆڤە، بۆیە بۆ خۆپاراستن لە نەخۆشییەكان، پێویستە كە هەموو هەنگاوەكان پەیڕەو بكرێن، هەروەها ساڵانە چەند پشكنینێكی گرنگ ئەنجام بدرێن بۆ بەسەركردنەوەی تەندرووستی، بەمەبەستی خۆپاراستن و زوو دەستنیشانكردنی هەر گرفتێك و زوو چارەسەركردنی.

پشكنینە پێویستەكان بریتین لە:

•  پشكنینی گشتیی خوێن CBC كە زۆر گرنگە بۆ دەستنیشانكردنی هەوكردنەكان، كەمخوێنی، ئاستی بەرگریی لەش، ژمارەی خڕۆكە سوور و سپییەكانی خوێن، ڕێژی هیمۆگلۆبین، لەگەڵ ژمارەی خەپلەكانی خوێن Platelets.

• پشكنینی خوێن بۆ ئاستی شەكری خوێن و HbA1c، ڕێژەی كانزای كالسیۆم، یوریا، ڤیتامین D و B12، چەورییەكانی خوێن.

• پشكنین بۆ فرمانی جگەر Liver function test كە گرنگە بۆ دەستنیشانكردنی نەخۆشیی جگەر لەگەڵ ئاستی چەند ئەنزیم و پرۆتینێكی خوێن.

• پشكنین بۆ فرمانی گورچیلە Kidney function test بۆ دیاركردنی تەندرووستیی گورچیلە و توانای فلتەركردنی خوێن بۆ زوو دەستنیشانكردنی فرمانی گورچیلەكان، كە پشكنینی خوێن و میز دەگرێتەوە.

• هەڵسەنگاندنی تەندرووستیی ئێسك، بۆنموونە تێستی سكانی DEXA بۆ دیاركردنی چڕیی ئێسك، بەمەبەستی زووتر ڕێگرتن لە ئەگەری شكانی ئێسك و پووكانەوەی ئێسك.

• پشكنینی فرمانی گلاندی دەرەقی كە زۆر گرنگە بۆ دیاركردنی ئاستی هۆرمۆنەكانی گلاندی دەرەقی، كە ئاستی وزەی لەش ڕێك دەخەن.