لە ساڵی 2012ەوە پڕۆژەیەكی رووپێویی شوێنەوار لەلایان تیمێكی زانكۆی هارڤاردی ئەمریكی و بەڕێوەبەرایەتی شوێنەواری هەولێر سەرپەرشتی دەكرێت دەستی پێ كردووە ئەو تیمەی زانكۆی هارڤارد بەهاوبەشی تیمەكەی بەڕێوەبەرایەتی شوێنەواری هەولێر لەئەنجامی ئەو رووپێوەدا750شوێنی شوێنەواریان لەدەشتی هەولێر دەستنیشانكردوە.
وەزارەتی شارەوانی و گەشتوگوزاری حکومەتی هەرێی کوردستان لە راگەیەندراوێکدا ئاماژەی بەوەداوە کە ساڵانە بۆ ماوەی یەك وەرز تیمێكی شوێنەواری كورد و زانكۆی هارڤاردی ئەمەریكی بە هاوبەشی ڕووپێوی شوێنەواریی ئەنجام دەدەن و وەزارەتی شارەوانی و گەشتوگوزاریش بە مەبەستی بایەخدان بەو كەرتە پاڵپشتی تەواوی پڕۆژە شوێنەوارییەكان دەكات و هاوكارە بۆ سەرخستنی كاری هاوبەشی تیمی شوێنەوارییەكان و بەڕێوەبەرایەتییەكانی شوێنەوار لە پارێزگا و ئیدارە سەربەخۆكاندأ.
هەروەها لەراگەیاندراوەكەدا باس لەوەشكراوە كە پڕۆژەی ڕووپێوی شوێنەواریی لە دەشتی هەولێر یەكێكە لە پڕۆژە گرنگەكانی سێكتەری شوێنەوار كە لەلایەن پڕۆفیسۆری شوێنەوارناس (دكتۆر جیسن ئور) سەرۆكی تیمی زانكۆی هارڤارد و بەڕێوەبەرایەتی شوێنەواری هەولێر سەرپەرشتی دەكرێت، سەرەڕای ئەوەی تاوەكو ئێستا 750 شوێنی شوێنەواریی لەو رووپێوەدا دەستنیشانكراوە و پڕۆژەكە لە ساڵانی داهاتووشدا بەردەوام دەبێت.