له‌ چوارچێوه‌ی گرینگدانی زیاتر به‌ بواری ژینگه‌پارێزی و ڕێكخستنه‌وه‌ی دامه‌زراوه‌ په‌یوه‌ندیداره‌كانی ئه‌و بواره‌، بە ئامادەبوونی نوێنەری سەرۆک بارزانی گۆڕانكاریی له‌ پێكهاته‌ی به‌تالیۆنی ژینگه‌پارێزی مێرگه‌سۆر ئه‌نجام درا.

دوێنێ یه‌كشه‌ممه‌، 14/2/2021، لەژێر چاودێریی مەلا مستەفا بارزانی، نوێنەری سەرۆک بارزانی بۆ کاروباری دەڤەری بارزان و بە ئامادەبوونی عەمید سامی سابر، فەرماندەی فەرماندەیی کارۆخ و عەمید زیرەک مەولوود فەرماندەی هێزی ژینگەپارێزی هەولێر، گۆڕانکاری لە پێکهاتەی بەتالیۆنی ژینگەپارێزی مێرگەسۆر ئەنجام درا.

بەپێی ئەو گۆڕانکارییە، بەرپرسی بەتالیۆن، جێگر و بەرپرسی چەند لق و بەشی ئەو بەتالیۆنە گۆڕدران و موقەدەم حەسەن حالی ئیسماعیل وەک بەرپرسی نوێی ئەو بەتالیۆنە دەستبەکار بوو.

لە دیدارێکیدا لەگەل پێکهاتەی بەتالیۆنەکە، مەلا مستەفا بارزانی، نوێنەری سەرۆک بارزانی بۆ کاروباری دەڤەری بارزان، بە ڕێز و سوپاسەوە ڕۆڵ و کاریگەریی ئەو فەرماندانەی کە کۆتایی بە ئەرک و بەرپرسیاریەتییان هاتووە، بەرز نرخاند و لە هەمان کاتدا پیرۆزبایی لە پێکهاتەی نوێ کرد و هیوای سەرکەوتنی بۆ خواستن. هەروەها داوای لێ کردن کە هەموو توانای خۆیان بخەنە گەڕ بۆ خزمەتی زیاتری خەڵک و پاراستنی ژینگەی جوانی دەڤەری بارزان.

هه‌روه‌ها جەختی لەوە کردەوە کە هەموو هەوڵی خۆی دەدات بۆ ئەوەی هاوشێوەی ئەو دەڤەرە، خزمەتی کولتوور و ژینگەپارێزیی هەر شوێنێکی تری کوردستان بکات.













باسنيوز