پشتی ئەڤرۆ رۆژا پێنج شەمبی ژلایێ رێکخراوەکێ ڤە، شەش ھرچ ل سەر چیایێ گارەیی ل قەزا ئامێدیێ ھاتینە ئازادکرن، گەشت و گۆزارا دھۆکێ دھێت سەر خەت و دیار دکەت کۆ ھەبونا وان ھرچان ل گارەیی، مەترسی ل سەر ژیانا گەشتیاران دێ بەردەوام بیت.

رێوار محەمەد رەشید، پەیڤدارێ رێڤەبەریا گشتی یا گەشت و گۆزارا پارێزگەھا دھۆکێ دیارکر: "ئەو کارێ ئەڤرۆ ژ لایێ رێکخراوەکێ ڤە ھاتیە ئەنجامدان بێی ئاگەھداریا مە بوویە و یا فەر بوو ھەماھەنگی دگەل رێڤەبەریا مە ھاتبا کرن تا کۆ جھەک ژ ھەژی و باش بۆ وان ھرچان ھاتبا دیارکرن".

ناڤبری وێ چەندێ ژی ناڤەشێریت: " ئەو کارە بێی ئاگەھداریا رێڤەبەریا گەشت و گازارا دھۆکێ ھاتیە کرن و ئەم دگەل ھەبونا ژینگەھەکا جوانین و ئازادیا گیانەوەران دخازین، لێ ئازادکرنا ھرچان ل گارەی مەترسیە ل سەر ژیانا گەشتیاران چونکە بەردام رۆژانە گەشتیار سەرەدانا چیایێ گارەی دکەن و جھێن باشتر ھەبون ھرچ لێ بھێن ئازادکرن و دخازین گەشتیار ل دەمێ سەرەدانا چیایێ گارەی دکەن ئاگەھی ژ خۆ ھەبیت چونکە ھەبونا ھرچان ل چیایێ گارەی ھەبونا مەترسیێ یە ل سەر ژیانا گەشتیاران".


bas news -